دوبئی(نیوزڈیسک ) زمبابوے کرکٹ ٹیم کے نوجوان فاسٹ باؤلر برائن ویٹوری کو غیر قانونی باؤلنگ ایکشن پر معطل کردیا گیا۔ کرکٹ ویب سائٹ کرک انفو کی رپورٹ کے مطابق برائن ویٹوری کے باؤلنگ ایکشن کو گزشتہ ماہ بنگلہ دیش کے خلاف ٹی ٹوئنٹی سیریز کے دوران مشکوک قرار دیا گیا تھا جس کے بعد ہندوستان کے شہر چنائی میں ان کے باؤلنگ ایکشن کو ہر زاویے سے جانچا گیا جس میں یہ ثابت ہوگیا کہ انٹرنیشنل کرکٹ کونسل (آئی سی سی) کی مقررکردہ حد 15 ڈگری سے تجاوز کررہا تھا۔ ویٹوری کو رواں ماہ کے آغاز میں زمبابوے کے ورلڈ ٹی ٹوئنٹی اسکواڈ سے بھی باہر کیا گیا تھا۔ آئی سی سی کے قوانین کے مطابق برائن ویٹوری پر بین الاقوامی مقابلوں پر پابندی کا اطلاق قومی فیڈریشن اور ڈومیسٹک کرکٹ پر بھی ہوگا تاہم بورڈ کی اجازت سے ویٹوری زمبابوے کے ڈومیسٹک مقابلوں میں حصہ لینے کے اہل ہوں گے۔ دوسری جانب ویٹوری اپنے باؤلنگ ایکشن کو درست کرنے کے بعد دوبارہ جانچ کے لیے کسی بھی موقع پر اپیل کرسکتے ہیں۔ 25 سالہ ویٹوری نے اگست 2011 میں ڈیبو کے بعد زمبابوے کی جانب سے 4 ٹیسٹ، 19 ون ڈے اور 11 ٹی ٹوئنٹی میچ کھیلے ہیں