ممبئی(نیوزڈیسک) بھارت کے سٹار بلے باز ویرات کوہلی اس پاکستانی مداح کی رہائی کیلئے حکومت پاکستان سے رابطہ کر سکتے ہیں ، جسے اپنے گھر پر بھارتی جھنڈا اور ویرات کوہلی کی تصویر لہرانے پر گرفتار کیا گیا تھا۔ تفصیلات کے مطابق ویرات کوہلی کے بھائی ’وکاس‘ کا کہنا ہے کہ وہ ویرات کوہلی کو پاکستانی مداح کے بارے میں بتا چکے ہیں تاہم ابھی اس موقع پر تفصیلی گفتگو کا موقع نہیں ملا لیکن ہم اس معاملے پر کچھ کرنے کی سوچ رہے ہیں۔
تفصیلات کے مطابق وکاس کا کہنا ہے کہ ” میں جمعے کے روز ہونے والے میچ کے فوراً بعد ویرات سے اس بارے میں بات کرنا چاہتا تھا لیکن وقت کی کمی کے باعث تفصیلی گفتگو نہیں ہو سکی البتہ انہیں گرفتار پاکستانی مداح کے بارے میں علم ہو چکا ہے۔ ہم متعلقہ لوگوں سے بھی مشورہ کریں گے جس کے بعد اس معاملے پر پاکستانی حکومت سے رابطہ کرنے یا نہ کرنے کا فیصلہ کیا جائے گا۔ ہم اس وقت ایک گھریلو تقریب میں مصروف ہیں اس لئے اس بارے میں پیش رفت نہیں ہو پا رہی لیکن اس تقریب سے فراغت پانے کے فوراً بعد اس معاملے سے متعلق فیصلہ کریں گے اور اس سے پہلے ویرات کوہلی سے تفصیلی گفتگو کی جائے گی“۔ واضح رہے کہ پنجاب کے شہر اوکاڑہ میں پولیس نے ایک نوجوان عمر دراز کو ملکی خودمختاری کو نقصان پہنچانے کے الزام میں اس وقت گرفتار کیا تھا جب اس نے ویرات کوہلی کے مداح کی حیثیت سے اپنے گھر کے باہر ہندوستانی جھنڈا اور ویرات کوہلی کی تصویر لہرائی۔ پولیس نے عمر دراز کے گھر سے ویرات کوہلی کے بڑے بڑے پوسٹر بھی برآمد کئے تھے۔ ضلعی پولیس افسر فیصل رانا کا کہنا ہے کہ ابتدائی تفتیش کے دوران عمر دراز نے بتایا کہ وہ ایک محب وطن پاکستانی ہے لیکن ویرات کوہلی کا بہت بڑا مداح ہے اور اسے نہیں معلوم تھا کہ بھارتی جھنڈا لہرانا پاکستانی قوانین کے خلاف ہے۔