کراچی(نیوز ڈیسک) قومی کرکٹرز کی جانب سے تین ماہ کا سینٹرل کنٹریکٹ ٹھکرانے کے بعدپاکستان کرکٹ بورڈ نے اب ایک سال معاہدہ کرنے کا فیصلہ کرلیاہے ۔ اس سے قبل ورلڈکپ کے دوران پی سی بی نے قومی کرکٹرز کیلئے سنٹرل کنٹریکٹ کی مدت تین ماہ رکھی جس پر کھلاڑی غصہ ہوئے اور کنٹریکٹ پر سائن نہیں کیا جس کے بعد پی سی بی سنٹرل کنٹریکٹ ایک سال کرنے پر مجبور ہوگئی۔
تفصیلات کے مطابق ورلڈکپ کے بعد بعض پلیئرز کو ریٹائر ہونا تھا جس کی وجہ سے پی سی بی نے تین ماہ کا معاہدہ پیش کیا لیکن بورڈ اور کھلاڑیوں کے درمیان تناز ع کھڑاہوگیا، کھلاڑی کے دستخط نہ کرنے کے باوجود ورلڈکپ ٹور کنٹریکٹ پر کھلاڑیوں کے دستخطوں پر ہی اکتفاءکرلیاگیا۔دوبارہ بورڈ نے سنٹرل کنٹریکٹ کے معاملے پرغور کیا اور کنٹریکٹ کی مدت بڑھا کر ایک سال کر نے کا فیصلہ کیاگیا۔
ذرائع نے بتایاکہ ٹیم کے حکام دورہ بنگلہ دیش سے قبل کھلاڑیوں سے دستخط کرانا چاہتے ہیں اور نئے معاہدوں میں معاوضے بڑھانے کے حوالے سے تاحال کوئی فیصلہ نہیں ہواکیونکہ ورلڈکپ میں ناقص کارکردگی کے سبب پلیئرز بھی اب بورڈ سے بات منوانے کی پوزیشن میں نہیں۔