آکلینڈ(نیوز ڈیسک)پاکستان کل ورلڈ کپ ایڈن پارک آکلینڈ میں اپنا پانچواں میچ جنوبی افریقہ سے کھیل رہا ہے۔ طویل قامت فاسٹ بولر محمد عرفان میچ کے لیے فٹ ہوگئے ہیں اور میچ کے لیے دستیاب ہوں گے۔ لیکن ایڑھی کی تکلیف کی وجہ سے حارث سہیل کی شرکت مشکوک ہے۔ ان کی جگہ یونس خان کی ٹیم میں واپسی متوقع ہے۔محمد عرفان یو اے ای کے خلاف میچ میں کولہے کی تکلیف کے سبب صرف تین اوورز کروانے کے بعد میدان سے باہر چلے گئے تھے۔ نوجوان لیفٹ ہینڈر بیٹسمین حارث سہیل نے یو اے ای کے خلاف ستر رنز کی عمدہ اننگ کھیلی۔ وہ لیفٹ آرم بولر کی حیثیت سے ہر میچ میں چند درمیانی اوورز بھی کروا رہے ہیں لیکن ایڑھی کی تکلیف کی وجہ سے حارث سہیل نے آج آکلینڈ میں ٹیم کے ساتھ پریکٹس بھی نہیں کی۔کپتان مصباح الحق کا کہنا ہے کہ ان کی شمولیت کا فیصلہ میچ کی صبح ہی کیا جائے گا۔ قومی ٹیم کے پاس محدود آپشنز کی وجہ سے حارث کے فٹ نہ ہونے پر یونس خان کی واپسی ہوگی۔