امیتابھ بچن 1970 کی دہائی میں بالی ووڈ کا حصہ بنا۔ اپنے لمبے قد اور پر وقار شخصیت کے باعث بہت جلد وہ لوگوں کے دل میں گھر کر گیا۔ اس کی ایکٹنگ اور بھاری بھرکم آواز کا جادو ہر دل پر چلتا تھا۔ اس نے ابتدا میں عام آدمی کے رول کیے، ایسا غریب آدمی جو سسٹم کے خلاف بغاوت کرتا نظر آتا تھا۔ امیتابھ نے شہرت کی ان بلندیوں کو چھوا کہ ایک فرینچ ڈائریکٹر نے امیتابھ کو ’ون مین انڈسٹری‘ کے خطاب سے نوازہ۔
امیتابھ نے بہت کامیابی اور عروج دیکھے لیکن ایک زمانہ ایسا آیا جب اس کی پے در پے بہت سی فلمیں ناکام ہوئیں اور اس کا اپنا ذاتی پروڈکشن ہاؤس بھی مالی مشکلات کا شکار ہو گیا۔ایسے میں امیتابھ کا مستقبل بہت سیاہ نظر آتا تھا لیکن اس نے ہار نہیں مانی اور اپنے بڑھاپے میں بالی ووڈ میں واپسی اختیار کی۔ اس وقت امیتابھ کی عمر 72 سال ہے اور وہ مسلسل کامیابی کی سیڑھیوں پر اور اونچا چڑھتا جا رہا ہے۔ امیتابھ کی آخری فلم پیکو بہت اچھا بزنس کر رہی ہے اور امیتابھ صرف انڈیا یا پاکستان میں بے حد مقبول نہیں رہا بلکہ اس کو بین الا قوامی سطح پر شہرت مل چکی ہے۔ پوری دنیا اس کو ایک انکیڈیبل انسان کے طور پر جانتی اور پہچانتی ہے۔ اس نے کوئی بیس سال بالکل گمنامی کی زندگی دیکھی مگر اس سے اس کے حوصلے میں کبھی کوئی فرق نہیں آیا تھا۔ اس کے بعد بھی وہ مشہور پروگرام ’کون بنے گا کڑوڑ پتی؟‘ جو کہ ایک انگریزی پروگرام سے ماخوذ کیا گیا تھا، اس کا میزبان بنا اور اپنی واپسی ٹی وی میڈیم کے ذریعے ممکن بنائی۔ ایک بار پھر لوگوں کو اپنا پرستار بنایا اور آج انڈیا کا سب سے پر اثر اور مقبول ایکٹر ہے۔اس نے یہ بات بھی پوری دنیا کو واضع کر دی کہ انسان کی عمر یا بڑھاپا اس کی خوبصورتی اور ٹیلنٹ کو کبھی متاثر نہیں کر سکتے اگر انسان کا عزم جوان ہو۔ وہ آج بھی ایک پھرتیلا اور پر جوش انسان ہے اور بہت سے جوان لوگوں سے بہت بہتر زندگی گزار رہا ہے۔
