بہاولپور(این این آئی)بہاولپور میں بستی کھوکھراں میں خسرہ کی ویکسینیشن کے بعد متعدد بچوں کی حالت بگڑگئی، جن میں سے3بچے جاں بحق اور 2بچوں کی حالت تشویشناک ہوگئی۔ہیلتھ ٹیم کی جانب سے خسرہ کی ویکسینیشن کی گئی تو ویکسین کے فوری بعد متعدد بچوں کی حالت بگڑگئی اس دوران 3بچے جاں بحق جبکہ 2بچوں کی حالت تشویشناک ہوگئی،

حالت غیر ہونے پر بچوں کو بہاولپور وکٹوریہ اسپتال ریفر کردیا گیا۔واقعے کی اطلاع ملتے ہی محکمہ ہیلتھ ، ڈبلیو ایچ او ٹیمیں موقع پر پہنچ گئیں۔ جاں بحق ہونے والے بچوں میں احمد 16ماہ اور عالیہ 8ماہ شامل ہیں جبکہ تیسرے بچے کی شناخت نہیں ہوپائی ہے۔بچوں کی ہلاکت کے معاملے پر ڈسٹرکٹ ہیلتھ آفیسر ڈاکٹر خالد آرائیں کا مقف سامنے آگیا ہے۔ انہوں نے کہا کہ خسرہ کے ٹیکے2سال تک کے بچوں کولگائے جاتے ہیں۔

ڈاکٹرخالد نے کہا کہ چند بچے ایسے تھے جنہیں موشن یا وومٹنگ تھی تو ان کو بھی خسرہ کی ویکسین کرائی گئی جبکہ خسرہ ویکسین لگانا ہر9ماہ کے بچے پرلازم ہوتا ہے۔انہوں نے کہاکہ بچوں کی ہلاکت الٹیاں موشن لگے ہونے کے باعث ہوئی ہے ان دنوں میں25سے زائد بچوں کو یہ ہی ویکسین کرائی گئی ہے، چند بچوں کی طبیعت پہلے سے ناسازہونے کے باعث بچوں کی ہلاکت ہوئی ہے ڈبلیو ایچ او کی ٹیم کے ہمراہ مزید تحقیقات کررہے ہیں۔

موضوعات:خسرہ