اسلام آباد (این این آئی) یوٹیلٹی سٹورز پر گھی کی قیمتوں میں کمی کے بعد دیگر کئی اشیائے ضروریہ کے نرخ بڑھادئیے گئے، مختلف اشیاء کی قیمتوں میں تین روپے سے ایک سو نوے روپے تک کا اضافہ کردیا گیا، نوٹیفکیشن جاری، قیمتوں میں اضافے اطلاق فوری طور پر ہوگا۔

یوٹیلیٹی اسٹورز پرمختلف اشیاء کی قیمتوں میں اضافے کا نوٹیفکیشن جاری کردیا گیاجس کے مطابق 450 گرام جیمزکی قیمت میں74روپے،500 گرام شہد کی قیمت میں 101روپے اورایک کلو چکن سپریڈ کی قیمت میں190روپے کا اضافہ ہوا،ایک کلو مایونیز100روپے تک مہنگی کی گئیں،

نوٹیفکیشن کے مطابق کیچپ کی800 گرام قیمت79 روپے،ساسز کی800 گرام قیمت میں 79روپے کا اضافہ اورایک کلو اچار80 روپے تک مہنگا کردیا گیا،اسی طرح یوٹیلیٹی اسٹورز پر دستیاب جوشاندہ کی قیمت میں 3روپے جبکہ اسپغول کی قیمت میں30 روپے تک کا اضافہ کیا گیا ،نئی قیمتوں کااطلاق فوری طور پر کردیا گیا ہے۔