تہران (این این آئی)ایران کے شورش زدہ جنوب مشرقی صوبے سیستان بلوچستان میں مسلح گروہ سے تصادم کے باعث 6 ایرانی سرحدی گارڈز مارے گئے۔سرکاری ٹی وی نے اتوار کو بتایا کہ پاکستانی سرحد کے قریب ملک میں داخل ہونے کی کوشش کرنے والے نامعلوم مسلح گروپ کے ساتھ جھڑپ میں 6 ایرانی سرحدی محافظ چل بسے ہیں۔

فارس نیوز ایجنسی کے مطابق اتوار کو ہونے والا یہ حملہ ایک دہشت گردوں پر مشتمل گروہ نے کیا ہے جو ملک میں دراندازی کرنا چاہتا تھا لیکن جھڑپ کے بعد وہ سرحد پار بھاگ گیا۔یہ لڑائی تہران سے 1,360 کلومیٹر جنوب مشرق میں جنوب مشرقی صوبے سیستان و بلوچستان کے قصبے سراوان میں ہوئی۔

رپورٹ میں کہا گیا کہ عسکریت پسند جانی نقصان کے ساتھ علاقے سے فرار ہو گئے، تاہم اس کی تفصیل نہیں بتائی گئی۔ٹی وی رپورٹ میں بتایا گیاکہ جھڑپ میں دو سرحدی محافظ زخمی ہوئے۔ اس نے کسی گروپ پر حملے کا الزام نہیں لگایا اور کسی گروپ نے فوری طور پر اس کی ذمہ داری قبول نہیں کی اور نہ ہی کوئی اضافی تفصیلات نہیں تھیں۔یہ علاقہ ایران کے سب سے کم ترقی یافتہ حصوں میں سے ایک ہے۔ اس علاقے میں طویل عرصے سے حالات خراب ہیں۔