لاہور( این این آئی)مرکزی صدر پاکستان تحریک انصاف چودھری پرویزالٰہی سے سابق سپیکر پنجاب اسمبلی چودھری افضل ساہی نے ان کی رہائش گاہ پر ملاقات کی۔ چودھری پرویزالٰہی نے کہا کہ حکومت جتنے چاہے مقدمے بنالے اور انکوائریاں کرا لے ہم انشاء اللہ عمران خان کا ساتھ نہیں چھوڑیں گے، پی ڈی ایم کی خام خیالی ہے کہ

وہ اب عمران خان کا راستہ روک سکتی ہے، عمران خان اس وقت پاکستانی قوم کی واحد امید ہیں، موجودہ حالات میں عمران خان ہی پاکستان کی کشتی پار لگا سکتے ہیں۔ انہوں نے کہا کہ برف پگھل چکی ہے امریکہ کو بھی اپنی غلطی کا احساس ہو گیا ہے، آج امریکہ کے پالیسی ساز ادارے عمران خان کو پاکستان کا واحد مقبول ترین لیڈر قرار دے رہے ہیں۔ چودھری پرویزالٰہی نے کہا کہ حکومت کے منفی پروپیگنڈے سے عالمی برادری میںپاکستان کا امیج خراب ہو رہا ہے، حکومت دنیا کو پیغام دے رہی ہے کہ پاکستان دہشت گردوں کے ہاتھوں یرغمال بن چکا ہے اور پاکستان ایک صوبہ میں الیکشن کرانے کی پوزیشن میں نہیں، جب حکومت خود یہ منفی پروپیگنڈا کرے گی تو کون پاکستان میں سرمایہ کاری کرے گا، آئی ایم ایف کے بعد ورلڈ بینک نے بھی پاکستان کی معیشت مزید خراب ہونے اور غربت و بیروزگاری مزید بڑھنے کی پیش گوئی کر دی ہے۔ انہوں نے کہا کہ حکومت صرف الیکشن سے فرار کیلئے بائیس کروڑ عوام کی قسمت سے کھیل رہی ہے، شہبازشریف حکومت کے ملک دشمن بیانیے سے صرف بھارت کو فائدہ پہنچ رہا ہے کیونکہ یہ بھارت ہی کا بیانیہ ہے کہ پاکستان دنیا کا ’’خطرناک ترین‘‘ ملک بن چکا ہے۔