اسلام آباد(این این آئی)وفاقی وزیر مملکت برائے پیٹرولیم سینیٹر ڈاکٹر مصدق ملک نے کہا ہے کہ عدالت نے سارے فیصلے کرنے ہیں تو پھر پارلیمان اور کابینہ کی کیا ضرورت ہے؟ اب کابینہ اور پارلیمان کی کوئی حیثیت نہیں رہ گئی۔نجی ٹی وی کے پروگرام میں گفتگو کرتے ہوئے وفاقی وزیرمملکت برائے پیٹرولیم نے کہاکہ (آج) سپریم کورٹ کیا فیصلہ کرے گی میں نہیں جانتا؟

ابھی تک جو فیصلے کئے ہیں ان سے لگتا ہے کہ سپریم کورٹ نے تمام ذمہ داری خود لی ہے ۔انہوں نے کہاکہ میرے خیال میں اب کسی ادارے کی ضرورت نہیں رہ گئی ہے،قانون بننے میں10دن لگتے ہیں، ایک قانو ن ہے جو ابھی نہیں بنا، اس کو بننے سے پہلے ختم کیا گیا۔ایک سوال کے جواب میں سینیٹر ڈاکٹر مصدق ملک نے کہاکہ سپریم کورٹ نے ڈائریکٹ اداروں کو حکم دیا ہے، اسٹیٹ بینک کس آئین و قانون کے تحت پیسے دے گا یہ کسی نے نہیں بتایا؟۔وفاقی وزیر مملکت برائے پیٹرولیم سینیٹر ڈاکٹر مصدق ملک نے کہاکہ مذاکرات کے حوالے سے سراج الحق کی کوششیں خوش آئند ہیں۔سابق گورنر سندھ اور پی ٹی آئی رہنما عمران اسماعیل نے پروگرام میں گفتگو کرتے ہوئے کہا عدالت نے 14 مئی کی تاریخ دی ہے الیکشن 14 مئی کو ہی ہوں گے، عدالت نے آئین کے تحت تاریخ دی ہے۔انہوں نے سخت تنقید کرتے ہوئے کہاکہ رانا ثناء اللہ کون ہوتے ہیں یہ فیصلہ دینے والے کہ 14مئی کو الیکشن نہیں ہوں گے۔انہوں نے کہاکہ سارے ملک میں الیکشن ایک ساتھ ہونے پر بات چیت ہو سکتی ہے، کریک ڈاون بند کریں گے تو بات ہو سکتی ہے، حکومت کو سپریم کورٹ پر اعتماد ہے نہ ججز اور بینچ پر، ہر جج کا نام لے کر گالم گلوچ کر رہے ہیں۔عمران اسماعیل نے کہاکہ خان صاحب!کے پاس مصدقہ معلومات ہیں کہ یہ عید پر کچھ کریں گے، کسی کی خواہش پر الیکشن ملتوی نہیں ہوں گے۔