اسلام آباد (نیوز ڈ یسک ) نیویارک میں شوکت خانم کینسر ہسپتال کے لیے منعقدہ فنڈ ریزنگ تقریب میں اس وقت سب حیران رہ گئے جب ایک پاکستانی نژاد بزنس مین نے ایک کروڑ روپے عطیہ کرنے کا اعلان کیا۔ میزبان شعیب اختر اور اداکارہ ریما حیرت سے چند لمحے خاموش رہ گئے اور پھر تصدیق کی کہ واقعی وہ اتنی بڑی رقم عطیہ کر رہے ہیں؟ بزنس مین نے مسکراتے ہوئے جواب دیا، “جی بالکل، میں یہ عطیہ دے رہا ہوں۔”تفصیلات کے مطابق نیویارک میں ہونے والی اس تقریب کے دوران پاکستانی امریکن بزنس مین مقصود ملک نے شوکت خانم اسپتال کے لیے ایک کروڑ روپے دینے کا اعلان کیا، جس پر ہال تالیوں سے گونج اٹھا۔
شعیب اختر اور ریما ابتدا میں یہ سمجھ ہی نہیں پائے کہ مقصود ملک نے کتنی بڑی رقم کا اعلان کیا ہے، اس لیے انہوں نے دوبارہ پوچھ کر یقین دہانی حاصل کی۔مقصود ملک، جو امریکہ میں ایک معروف کنسٹرکشن کمپنی کے مالک ہیں، نے بتایا کہ ان کے خاندان کے کئی افراد کینسر کے باعث جان کی بازی ہار چکے ہیں جبکہ ان کے والد کو بھی جگر کے کینسر کا سامنا رہا، اس لیے وہ اس بیماری کی تکلیف کو بخوبی سمجھتے ہیں۔تقریب کے شرکاء، شعیب اختر اور ریما نے مقصود ملک کے اس جذبۂ انسانیت اور خیرسگالی کے عزم کو زبردست خراجِ تحسین پیش کیا اور ان کے اقدام کو دوسروں کے لیے ایک روشن مثال قرار دیا۔
