اسلام آباد (نیوز ڈ یسک )خیبر پختونخوا میں سرکاری ملازمین کے تبادلوں، تقرریوں اور بھرتیوں پر عائد پابندی ختم کر دی گئی ہے۔ذرائع کے مطابق یہ پابندی اس وقت لگائی گئی تھی جب صوبے میں کابینہ تاحال تشکیل نہیں پائی تھی، تاہم اب کابینہ کی تشکیل کے بعد وزیراعلیٰ نے اس پابندی کے خاتمے کا باضابطہ اعلان کر دیا ہے۔جاری اعلامیے میں بتایا گیا ہے کہ گریڈ 17 اور اس سے اوپر کے افسران کے تبادلے متعلقہ انتظامی سیکرٹری، وزیر، مشیر یا معاون خصوصی کی منظوری سے کیے جائیں گے۔

وزیراعلیٰ نے تمام محکموں کو ہدایت دی ہے کہ بھرتیوں کا عمل شفاف اور میرٹ کی بنیاد پر مکمل کیا جائے تاکہ کسی بھی قسم کی بدعنوانی یا اقربا پروری سے اجتناب ہو۔مزید برآں، صوبے میں اہم تقرریاں بھی عمل میں لائی گئی ہیں۔ گریڈ 20 کے سینیئر پولیس افسر محمد علی گنڈاپور کو ایڈیشنل آئی جی ایلیٹ فورس خیبر پختونخوا تعینات کر دیا گیا ہے، جبکہ محمد حسین کو ڈی آئی جی کرائم اینڈ انویسٹی گیشن کے عہدے پر مقرر کیا گیا ہے۔وزیراعلیٰ سیکرٹریٹ کے اعلامیے میں واضح کیا گیا ہے کہ ان احکامات پر سختی سے عمل درآمد یقینی بنایا جائے گا تاکہ انتظامی امور میں بہتری لائی جا سکے۔