لاہور (مانیٹرنگ، این این آئی) جماعت اسلامی کے امیر سراج الحق کی سیاستدانوں کو ساتھ بٹھانے کی کوششوں میں مثبت پیشرفت سامنے آئی ہے۔وزیراعظم شہباز شریف سے جماعت اسلامی کے امیر سراج الحق کی تین رکنی وفد کے ہمراہ ملاقات ہوئی، ملاقات میں ملک کی موجودہ سیاسی صورتحال پر تبادلہ خیال کیا گیا۔
ملاقات میں وفاقی وزیر برائے اکنامک افیئرز ڈویژن سردار ایاز صادق اور وفاقی وزیر برائے ریلوے و ہوا بازی خواجہ سعد رفیق بھی شامل تھے۔شہباز شریف سے ملاقات کے دوران سراج الحق نے کہا کہ ملک میں ایک ہی وقت انتخابات موضوع ہیں۔اس موقع پر ملاقات میں ملک کی موجودہ سیاسی صورتحال پر تبادلہ خیال کیا گیا۔شہباز شریف سے ملاقات کے بعد حکومت اور اپوزیشن کے درمیان بڑھتے ہوئے سیاسی تناؤ کو کم کرنے کے لئے امیر جماعت اسلامی سراج الحق کی سربراہی میں وفد مفاہمت کا پیغام لے کر چیئرمین پاکستان تحریک انصاف عمران خان سے ملاقات کے لئے ان کی رہائش گاہ زمان پارک پہنچا، وفد میں لیاقت بلوچ اور امیر العظیم بھی شامل تھے۔جماعت اسلامی کے وفد نے سابق وزیر اعظم عمران خان سے ملاقات کی، اس دوران موجودہ سیاسی صورتحال پر تبادلہ خیال کیا گیا، سراج الحق نے چیئرمین پی ٹی آئی کو سیاسی تناؤ کم کرنے پر زور دیا، اس موقع پر محمود الرشید، اعجاز چودھری اور شبلی فراز بھی موجود تھے۔اس دوران امیر جماعت اسلامی سراج الحق نے سابق وزیراعظم عمران خان کو سیاسی جماعتوں سے مذاکرات کی دعوت دی۔سراج الحق کا کہنا تھا کہ سیاسی صورتحال کو سیاسی طریقے سے مل بیٹھ کرحل کرنا ہو گا،ملک اس وقت کسی غیر یقینی صورتحال کا متحمل نہیں ہوسکتا، ایک ہی وقت پرانتخابات ہوناملک کے لیے بہتر ہے، ایک ہی وقت پرانتخابات ہونا جماعت کا ٹھوس موقف ہے۔نجی ٹی وی کے مطابق حکومت اور تحریک انصاف نے مذاکرات کی میز پر بیٹھنے پر آمادگی ظاہر کردی ہے۔
