برمنگھم (این این آئی)برطانیہ کے شہر برمنگھم کے کنگز ہیتھ محلے میں بدھ کی رات ایک73سالہ بزرگ پر تین افراد نے حملہ کیا ہے، بزرگ مسلمان شہری مسجد سے گھر جا رہے تھے۔متاثرہ شخص کو ہاتھ اور چہرے پر زخموں کے ساتھ ہسپتال لے جایا گیا۔ سوشل میڈیا پر گردش کرنے والی ویڈیوز میں
متاثرہ شخص کے چہرے سے خون بہتا دیکھا جاسکتا ہے۔سی سی ٹی وی کیمرے کی فوٹیج میں دکھایا گیا ہے کہ حملہ آور حملہ سے قبل کالے رنگ کی گاڑی میں بیٹھے تھے۔ ایک نے بزرگ کو پیٹھ پر زور سے لات ماری جس سے وہ گر گئے اور ان کا سر ایک ڈسپلے بورڈ پر جا لگا۔ اس کے بعد یہ گروہ فوری طور پر جائے وقوعہ سے فرار ہوتا ہوا نظر آتا ہے۔موسیلے اور کنگز ہیتھ پولیس کے سارجنٹ کرس گیلن کا کہنا ہے کہ ہم متاثرہ شخص سے مکمل بیان لیں گے، جو ہسپتال میں ہے، ہمارے افسران آج صبح سے ہی علاقے میں موجود ہیں جو سی سی ٹی وی بازیاب کر رہے ہیں اور گھر گھر انکوائری کر رہے ہیں۔ ہم حملہ آوروں اور وہ جس کار میں سوار تھے ان کی شناخت کے لیے سخت محنت کر رہے ہیں۔حملہ آوروں کی شناخت دو سفید فام اور ایک سیاہ فام کے طور پر کی گئی ہے، جن کی عمریں 18 سے 30 سال کے درمیان تھیں اور انہوں نے ٹریک سوٹ پہن رکھے تھے۔
