اسلام آباد (این این آئی)سرکاری حج سکیم میں درخواستوں کی وصولی کا سلسلہ جاری ہے، 22 مارچ تک 26 ہزار سے زائد درخواستیں بینکوں میں موصول ہو چکی ہیں،سپانسرشپ سکیم کے تحت بیرون ملک سے ڈالر منگوانے والے درخواست گزاروں کی تعداد 2 ہزار سے زائد ہو گئی ہے، درخواست گزاروں کے فیڈ بیک پر ان کی آسانی کیلئے
بینکوں کو مزید ہدایات جاری کر دی گئی ہیں۔ذرائع کے مطابق 22 مارچ تک 26 ہزار سے زائد درخواستیں بینکوں میں موصول ہوئیں، اسپانسر شپ اسکیم کے تحت بیرون ملک سے ڈالر منگوانے والے درخواست گزاروں کی تعداد 2 ہزار سے زائد ہو گئی۔ذرائع کے مطابق حج درخواست گزاروں کے فیڈ بیک پر آسانی کے لیے بینکوں کو مزید ہدایات جاری کر دی گئی ہیں۔ذرائع کے مطابق سمندر پار پاکستانی بیرون ملک سے بنوایا گیا میڈیکل فٹنس سرٹیفکیٹ بھی بینک میں جمع کروا سکتے ہیں، مشکل کی صورت میں سادہ صفحے پر بیان حلفی بینک میں جمع کرائیں کہ صحت مند ہیں تاہم پاکستان واپسی پر حج پرواز سے پہلے پاکستان سے میڈیکل فٹنس سرٹیفیکیٹ بنوا کر بینک میں جمع کروانا ہو گا۔ذرائع کے مطابق درخواست گزار منظور شدہ ویکسین کی پہلی ڈوز لگوا کر درخواست جمع کروا سکتے ہیں تاہم حج کے لیے روانگی سے قبل مکمل ڈوز لگوا کر بینک میں سرٹیفیکیٹ جمع کرانا ہو گا، نادرا کے علاوہ غیر ملکی ویکسین سرٹیفکیٹ بھی قابل قبول ہو گا۔ذرائع کے مطابق نامزد بینک حج درخواستیں 25 اور 26 مارچ کو بھی وصول کریں گے اور اسپانسرشپ بھجوانے والیکا عازمین حج سے خونی رشتہ ہونا ضروری نہیں ہے، رقم کے ہمراہ عازم حج کا نام، شناختی کارڈ اور رابطہ نمبربھجوانا لازم ہے، آسانی کے لیے آسان اکاؤنٹ کی حد 10 لاکھ سے بڑھا کر15 لاکھ کی جا چکی ہے۔ذرائع کے مطابق حجاج کرام کو سعودی عرب میں قربانی کا کوپن خود خریدنا ہو گا،
قربانی کوپن خریدنے کے لیے پاکستان حج مشن سعودی عرب میں رہنمائی کرے گا، قربانی کوپن کی رقم 700 تا 1000 ریال ہو سکتی ہے۔ذرائع کے مطابق ریگولر اسکیم کے سمندر پار درخواست گزار پاکستان میں نامزد فرد کے ذریعے حج درخواست جمع کرائیں، پیکیج میں ممکنہ بچت وصول کرنے کے لیے پاکستان پہنچ کر بینک اکاؤنٹ کھلوانا لازم ہو گا، حج درخواستیں نامزد بینکوں کے ذریعے ہی پراسیس ہوں گی۔
