کراچی (پی پی آئی)پاکستان کے سینیئر اداکار محمود اسلم نے خود سے متعلق انتقال کی خبروں کو جعلی قرار دیتے ہوئے تفصیلی بیان جاری کردیا۔گزشتہ روز سوشل میڈیا پر متعدد فیس بک پوسٹ اور انسٹاگرام اور ٹوئٹر صارفین کی جانب سے محمود اسلم کے انتقال کی خبریں گردش کر رہی تھیں۔

محمود اسلم سے متعلق انتقال کی خبریں گردش کرنے کے بعد ان کے چاہنے والے تجسس میں پڑ گئے۔اداکار محمود اسلم نے اپنے آفیشل انسٹاگرام اکاونٹ پر ایک ویڈیو شیئر کی، جس میں انہوں نے افواہوں کی تردید کرتے ہوئے کہا کہ کچھ دیر قبل کسی نے سوشل میڈیا پر خبر شائع کردی کہ محمود صاحب کا انتقال ہوچکا ہے۔انہوں نے جعلی خبریں پھیلانے والوں پر افسوس کا اظہار کرتے ہوئے کہا کہ جس نے بھی یہ خبر گردش کی ہے میں گزارش کرنا چاہتا ہوں کہ خدا کے لیے جب تک آپ کسی خبر کی تصدیق نہ کرلیں اسے پوسٹ نہیں کرنا چاہے۔اداکار کا کہنا تھا کہ ’جھوٹی خبر سن کے میرے گھر والے، دوست احباب پریشان ہوگئے ہیں۔‘انہوں نے سخت الفاظ میں گزارش کی کہ ’میں زندہ سلامت ہوں، غلیظ اور گندی حرکت کرنے سے قبل 10 بار سوچا کریں، شاید آپ اسے مذاق سمجھ رہے ہوں لیکن یہ مذاق نہیں ہے‘۔اداکار محمود اسلم کی انسٹاگرام پوسٹ پر اداکارہ عائشہ عمر نے ان کی خیریت کی دعا کرتے ہوئے لکھا کہ ’ہمارے محمود صاحب بالکل صحیح سلامت ہیں، اللہ ان کی حفاظت فرمائے‘۔خیال رہے کہ محمود اسلم پاکستان کے معروف اداکار ہیں، معروف مزاحیہ ڈرامہ ’بلبے‘ میں محمود اسلم کی اداکاری کو مداحوں کی جانب سے بے حد پسند کیا جاتا ہے۔ان کے معروف ڈراموں میں اندھیرا اجالا، پیاس، دن، اڑان شامل ہیں۔