کینبرا(این این آئی )آسٹریلیا کے جنوب مشرقی علاقے میں پانی کے تالاب اور ندی میں پانی کی کمی اور شدید گرمی کے باعث لاکھوں مچھلیاں مری ہوئی پائی گئیں۔غیرملکی خبررساں ادارے کی رپورٹ کے مطابق نیو ساتھ ویلز ریجن میں پرائمری انڈسٹریز کے محکمے کے
ذمہ داروں کا کہنا تھا کہ اتنی بڑی تعداد میں مچھلیوں کے مرنے کی وجہ شدید گرمی کی لہر ہے۔رپورٹ میں بتایا گیا ہے کہ مچھلیوں کی موت ممکنہ طور پر آکسیجن کی کم سطح کی وجہ سے ہوئی ہے کیونکہ گرم موسم کی وجہ سے مچھلیوں کو زیادہ آکسیجن کی ضرورت ہوتی ہے جس کی وجہ سے صورتحال خراب ہے۔دوسری جانب آسٹریلیا کے جنوبی علاقے مینیندی کے قریبی قصبے کے رہائشیوں نے مردہ مچھلیوں کے موجودگی کے باعث شدید بدبو کی شکایت کی ہے۔ایک مقامی شہری جان ڈیننگ نے بتایا کہ اتنی بڑی تعداد میں مردہ مچھلیوں کو دیکھنا انتہائی خوفناک ہے اور بدبو میں رہنا مشکل ترین ہے۔واضح رہے کہ 2018 کے آخر اور 2019 کے اوائل میں شدید خشک سالی کے دوران مینندی کے دریا پر مچھلیوں کی بہت زیادہ ہلاکتیں ہوئی تھیں اور مقامی لوگوں نے لاکھوں کی تعداد کا تخمینہ لگایا۔
