واشنگٹن(این این آئی)عالمی انسانی حقوق پر امریکی انتظامیہ کی سالانہ رپورٹ کے مطابق پاکستان تحریک انصاف کی حکومت آئینی طریقے سے ہٹائی گئی۔نجی ٹی وی کے مطابق عالمی انسانی حقوق پر امریکی انتظامیہ کی سالانہ رپورٹ نے بتایاکہ آئینی طریقے سے پی ٹی آئی حکومت کو ہٹا کر شہباز شریف کی قیادت میں
مخلوط حکومت بنائی گئی۔رپورٹ میں کہا گیا کہ بھارت میں انسانی حقوق کی خلاف ورزیاں جاری ہیں، آزادی اظہار و صحافت پر پابندیاں مودی حکومت میں جاری ہیں۔امریکی انتظامیہ کی رپورٹ میں کہا گیا کہ مقبوضہ کشمیر میں دہشت گردوں کارروائیاں گزشتہ سال بھی ہوتی رہیں، مودی حکومت میں پولیس تشدد اور ماورائے عدالت قتل ہوئے۔پاکستان کے حوالے سے امریکی انتظامیہ نے اپنی رپورٹ میں کہاکہ پاکستان میں بھی انسانی حقوق کی خلاف ورزیاں جاری رہیں، انسانی حقوق کے نمائندے ادریس خٹک کو آرمی ایکٹ کے تحت سزا دی گئی اور سابق وزیر اعظم کے قریبی ساتھیوں نے ٹارچر کا دعویٰ کیا۔یاد رہے کہ گزشتہ برس 10اپریل کو قومی اسمبلی نے 174ووٹوں سے عمران خان کی حکومت کے خلاف تحریک عدم اعتماد منظور کی تھی جس کے نتیجے میں عمران خان کی حکومت کا خاتمہ ہو گیا تھا۔عمران خان کی حکومت کے خاتمے کے بعد پی ڈی ایم اور پیپلز پارٹی نے شہباز شریف کو اکثریتی ووٹوں سے وزیراعظم منتخب کیا تھا تاہم عمران خان نے پہلے اپنی حکومت گرانے کا الزام امریکا پر عائد کیا اور پھر بعد ازاں کہا کہ ان کی حکومت گرانے میں جنرل ریٹائرڈ باجوہ نے اہم کردار ادا کیا۔
