سرگودھا(این این آئی)پنجاب پولیس ملازمین کو بیٹی کی شادی کے موقع پر ملنے والی محکمانہ امداد میں اضافہ کردیا۔
آئی جی پنجاب ڈاکٹر عثمان انور نے نئی پولیس ویلفئیر پالیسی کے تحت ہونے والے اقدامات بارے فورس کے نام پیغام میں بتایا کہ نئی پالیسی کے تحت پولیس ملازمین کو بیٹی کی شادی پر ایک لاکھ روپے بطور تحفہ دئیے جائیں گے۔ایک سے زیادہ بیٹیوں کے والدکو ہر بیٹی کی شادی پریکساں ایک لاکھ روپے دئیے جائیں گے۔آئی جی پنجاب ڈاکٹر عثمان انور نے اس تحفے کے بدلے میں پولیس ملازمین کو قوم کی بیٹیوں کے تحفظ کا فریضہ بھرپور فرض شناسی سے ادا کرنے کا حکم دیا اور کہا کہ دوسروں کی بیٹیوں کی طرف بڑھنے والے ہاتھ اوراٹھنے والی آنکھ کو اسی طرح روکیں جیسے اپنی بیٹیوں کی حفاظت کرتے ہیں۔آئی جی پنجاب کا پولیس ملازمین کو محکمہ کی جانب سے ملنے والے تدفین کے اخراجات کو بھی دوگنا کرنے کا اعلان کر دیا جس میں دوران سروس انتقال پر پولیس ملازم کے لواحقین کو 50ہزار کی بجائے ایک لاکھ روپے ملیں گے۔ انہوں نے کہا کہ پولیس ملازم پر لازم ہے کہ اپنے فرائض بھرپور ایمانداری، خلوص نیت اور فرض شناسی کے ساتھ ادا کریں۔
