الیکشن ضابطہ اخلاق کی خلاف ورزی کے الزامات، پرویز خٹک اور شہریار آفریدی نے 50، 50ہزار روپے جرمانہ جمع کرا دیا
پشاور(آئی این پی)پی ٹی آئی رہنما، و سابق وفاقی وزرا پرویز خٹک اور شہریار آفریدی نے 50، 50ہزار روپے جرمانہ سرکاری خزانے میں جمع کرا دیا،الیکشن کمیشن خیبر پختون خوا کے مطابق پرویز خٹک این اے 25نوشہرہ سے ضمنی انتخابات میں حصہ لے رہے ہیں، ان پر بلدیاتی انتخابات میں لوئر دیر میں ضابطہ اخلاق کی خلاف ورزی کا الزام ہے،الیکشن کمیشن کے پی کا کہنا تھا کہ پرویز خٹک نے وفاقی وزیر کی حیثیت سے جلسے میں شرکت کی تھی، جس پر ڈسٹرکٹ مانیٹرنگ آفیسر نے ان پر 50ہزار روپے جرمانہ عائد کیا تھا، پرویز خٹک نے جرمانہ سرکاری خزانے میں جمع نہیں کرایا تھا،الیکشن کمیشن کی جانب سے آر اوز کو ہدایت کی گئی تھی کہ ضمنی انتخابات کے ایسے امیدواروں سے سابقہ جرمانے کی وصولی کی جائے، سابق وفاقی وزیر شہر یار آفریدی نے بھی 50ہزار روپے جرمانہ قومی خزانے میں جمع کرا کے چالان ریٹرننگ آفیسر کو پیش کر دیا ہے۔
