اسلام آباد (مانیٹرنگ ڈیسک)ترکیہ میں ایک بار پھر زلزلے کے شدید جھٹکے محسوس کیے گئے۔غیر ملکی میڈیا کے مطابق سینٹرل ترکیہ میں منگل کے روز ایک بار پھر زلزلے کے شدید جھٹکے محسوس کیے گئے ۔

شدت 5.6 ریکارڈ کی گئی جب کہ زلزلے کی گہرائی زیر زمین 2 کلومیٹرتھی۔میڈیا رپورٹس کے مطابق زلزلے کے تازہ جھٹکوں سے فوری طور پر کسی جانی نقصان کی اطلاع نہیں ملی ہے۔میڈیا رپورٹس کے مطابق ترکیہ میں پیر کے روز 7.8 شدت کے زلزلے سے ہلاکتوں کی تعداد 2 ہزار سے زائد ہوگئی ہے جب کہ ترکیہ اور شام میں مجموعی طور پر ہلاکتیں 4300 سے زائد ہیں۔ترک حکام کا کہنا ہےکہ پیر کے روز آنے والے زلزلے کے نتیجے میں 3700 سے زائد بلڈنگز زمین بوس ہوئیں۔دوسری جانب ترکیہ اور شام میں خوفناک زلزلے میں امداد کے لیے حکومت پاکستان کی ہدایات پر 51 رکنی ریسکیو ٹیم آج صبح لاہور سے استنبول کے لیے روانہ ہوگئی۔ترجمان پی آئی اے کے مطابق اس سلسلے میں پاکستان انٹرنیشنل ائیرلائنز نے خصوصی انتظامات کیے ہیں۔پی آئی اے کی پرواز پی کے707 پاکستانی ریسکیو ٹیم اور ان کے خصوصی آلات کو لے کر صبح سویرے لاہور سے استنبول روانہ ہوئی جس میں امدادی سامان بھی بھیجا گیا ہے۔