ریاض (این این آئی )سعودی عرب کے نجران ریجن میں شادی کے بعد چھ سال تک اولاد کی نعمت سے محروم دوشیزہ نے بیک وقت تین بچوں کو جنم دیا ہے۔غیرملکی خبررساں ادارے کے مطابق محکمہ صحت نجران نے بتایا کہ ہسپتال میں ایک خاتون کو ایمرجنسی وارڈ میں لایا گیا۔ فوری طور پر ٹیسٹ کیے گئے۔ڈاکٹروں نے صورتحال کی نزاکت کے پیش نظر آپریشن کا فیصلہ کیا۔ سعودی خاتون نے تین بچوں کو جنم دیا ان میں ایک بیٹا اور دو بیٹیاں ہیں۔ بچوں کا وزن 1550 سے 1800 گرام تک ہے۔محکمہ صحت کا کہنا تھا کہ خاتون کو زچگی کے بعد پہلے جنرل وارڈ منتقل کیا گیا۔ اب ہسپتال سے فارغ کردیا گیا ہے۔ہسپتال انتظامیہ کے مطابق سعودی خاتون بانجھ پن کے باعث 6 برس سے ہسپتال سے رجوع کر رہی تھی۔