لاہو ر( این این آئی) پاکستان تحریک انصاف نے شیخوپورہ سے (ن) لیگ کی اہم وکٹ گرا دی ، نائب صدر (ن) لیگ اقلیتی ونگ پنجاب ڈاکٹر قیصر شہزاد نے اپنے ساتھیوں سمیت تحریک انصاف میں باقاعدہ شمولیت کا اعلان کر دیا ۔تحریک انصاف کے مرکزی سیکرٹری جنرل اسد عمر ،سنٹرل پنجاب کے صدر ڈاکٹر یاسمین راشد سے

سابقہ ایم این اے و مرکزی صدر جے پرکاش اور صدر منیارٹی ونگ سنٹرل پنجاب شنیلا روت کی قیادت میں شیخوپورہ سے وفد نے ملاقات کی ۔ اس موقع پر عامر ڈوگر رانا عبدالسمیع شہنیلا علی داود گل اور سلمان نعمت بھی موجود تھے ۔ چیئرمین آل پاکستان پاسٹر الائنس و نائب صدر (ن) لیگ اقلیتی ونگ پنجاب ڈاکٹر قیصر شہزادنے اپنے ساتھیوں سمیت تحریک انصاف میں باقاعدہ شمولیت کا اعلان کیا ۔ نئے شامل ہونے والے ساتھیوں میں کونسلر یقوب مسیح ،نیشنل کوارڈینیٹر پاسٹر اسلم غوری ،پاسٹر رکس بھٹی ، پاسٹر احسان گل ،ناظم اشرف ،پاسٹر عاشر اشرف ،صدر وارث مسیح شامل ہیں ۔ ڈاکٹر قیصر شہزاد اور ان کے ساتھیوں نے چیئرمین عمران خان کی قیادت پر آپنے بھرپور اعتماد کا اظہار کیا ۔ اسد عمر اور ڈاکٹر یاسمین راشد نے نئے شامل ہونے والے ساتھیوں کے گلے میں پارٹی مفلر پہنائے ۔ انہوں نے پارٹی میں شامل ہونے والے نئے ساتھیوں کو خوش آمدید کرتے ہوئے کہا کہ حکومت نے غریب عوام پر پٹرول بم گرا کر کھلی دشمنی کا ثبوت دیا ہے ۔ اسد عمر نے کہا کہ تحریک انصاف عوام کی امنگوں کی ترجمان جماعت ہے ،عمران خان وہ واحد لیڈر ہے جس نے تمام صوبوں کو اکٹھا کیا ۔اقلیتوں کا ملک کی ترقی اور خوشحالی میں اہم کردار ہے ۔ ڈاکٹر یاسمین راشد نے کہا کہ تحریک انصاف وفاقی کی سب سے بڑی جماعت بن کر ابھری ہے ،اقلیتیں پاکستان کا خوبصورت گلدستہ ہے ۔شنیلا روت نے کہا کہ ڈاکٹر قیصر شہزاد اور ان کے ساتھیوں کی تحریک انصاف میں

شمولیت سے پی ٹی آئی شیخوپورہ میں مزید مضبوط ہوگی ۔جے پرکاش نے کہا کہ کرسچن کمیونٹی عمران خان کے شانہ بشانہ کھڑی ہے ، تحریک انصاف کا اقلیتوں کے ووٹ بینک میں دن بدن اضافہ ہو رہا ہے ۔ڈاکٹر قیصر شہزاد نے کہا کہ شنیلا روت کی کاوشوں سے میں اور میرے ساتھی پی ٹی آئی کی فیملی میں شامل ہوئے ہیں ،(ن)لیگ نے عوام کو سخت مایوس کیا ،شریف خاندان اور ان کے حواری اپنے ذاتی مفاد کی سیاست کر رہے ہیں ۔ملک اور قوم کی کوئی انہیں فکر نہیں ۔