لاہور( این این آئی)پاکستان مسلم لیگ (ن) کی سینئر نائب صدر و چیف آرگنائزر مریم نواز آج( ہفتہ) کے روز وطن واپس پہنچیں گی ، مریم نواز لندن سے دبئی پہنچی تھیں جہاں وہ ایک روز قیام کے بعد وطن واپس آرہی ہیں ، مسلم لیگ (ن) کی جا نب سے مریم نواز کی وطن واپسی پر پرتپاک استقبال کی تیاریاں مکمل کر لی گئی ہیں ،

لیگی رہنما کو ایک بڑے جلوس کی صورت میں ائیر پورٹ سے ان کی رہائشگاہ جاتی امراء رائے ونڈ لایا جائے گا ۔ تفصیلات کے مطابق مسلم لیگ (ن) کی سینئر نائب صدر مریم نواز اپنے علاج اور والد محمد نواز شریف سے ملاقات کے لئے ماہ اکتوبر میں لاہور سے لندن کیلئے روانہ ہوئی تھیں ، اس وقت یہ اعلان کیا گیا تھا مریم نواز ایک ماہ قیام کے بعدنومبر میں وطن واپس پہنچ جائیں گی تاہم اس میں تاخیر ہوتی گئی ۔ مریم نواز اپنے والد کے ہمراہ لندن سے جنیوا بھی گئیںجہاں ان کے گلے کا آپریشن ہوا جس کے بعد ان کی دوبارہ لندن واپسی ہو ئی ۔ لندن میں قیام کے دوران ہی پارٹی کی جانب سے انہیں پارٹی کی سینئر نائب صدر اور چیف آرگنائزر کا عہدہ بھی تفویض کیا گیا ۔ مریم نواز نے تین ماہ 20 روز بیرو ن ملک قیام کے بعد وطن واپس آرہی ہے ہیں اور واپسی پر ان کے پرتپاک استقبال کیلئے تیاریاں کی گئی ہیں۔ شیڈول کے مطابق مریم نواز دوپہر دو بجے لاہور کے ائیر پورٹ اتریں گی جہاں پارٹی کے سینئر رہنما ان کا استقبال کریں گے ۔بعد ازاں انہیں جلوس کی صورت میں ائیر پورٹ سے ان کی رہائشگاہ جاتی امراء لایا جائے گا۔ مسلم لیگ(ن) کے رہنمائوں اور کارکنان کی جانب سے مریم نواز کے استقبال کے لئے استقبالیہ کیمپ لگائے جائیں گے ۔علاوہ ازیں مسلم لیگ (ن) لاہور کے صدر سیف الملوک کھوکھر کی سربراہی میں مریم نوازکی وطن واپسی کے موقع پر

شاندار استقبال کیلئے اجلاسوں اوررابطوں کا سلسلہ گزشتہ روز بھی جاری رہا ۔ بتایا گیا ہے کہ لاہور کے علاوہ قریبی اضلاع اور ملک کے دیگر حصوں سے بھی کارکنان لاہور ائیر پورٹ پہنچیں گے۔ پولیس کی جانب سے مریم نواز کی وطن واپسی کے موقع پر جلوس کی صورت میں رہائشگاہ پہنچنے کے پیش نظر سکیورٹی کے انتہائی سخت انتظامات کئے جائیں گے۔