لاہور( این این آئی) قومی کرکٹ ٹیم کے سابق کپتان انضمام الحق نے کہا ہے کہ چیف سلیکٹر کے لیے مجھ سے رابطہ نہیں کیا گیا، جب کوچ یا چیف سلیکٹر کی پیشکش ہوگی تو دیکھوں گا،غیر ملکی کوچ ہی پاکستانی ٹیم کا حل نہیں، پاکستانی کوچز بھی اچھے ہیں۔تقریب کے دوران میڈیا سے گفتگو کرتے ہوئے
انہوں نے کہا کہ بابر اعظم پر دبائو نہیں ہے لیکن کپتانی وقت کے ساتھ ہی آتی ہے، انہیں مزید کپتانی کا موقع ملنا چاہیے۔انہوں نے کہا کہ کسی بھی کھلاڑی پر دبائو ہو تو اس کی کارکردگی متاثر ہوتی ہے، بابر اعظم کی تینوں فارمیٹ میں کارکردگی بہترین ہے۔انہوں نے کہا کہ کھیلوں سے متعلق پاکستان کا موقف ہمیشہ مثبت رہا ہے، افغانستان ہو یا بھارت کرکٹ کھیلنی چاہیے۔انضمام الحق نے کہا کہ غیر ملکی کوچ ہی پاکستانی ٹیم کا حل نہیں، پاکستانی کوچز بھی اچھے ہیں، میرے دور میں مکی آرتھر نے بہت اچھا کام کیا تھا، ہمارے کوچز ثقلین مشتاق اور محمد یوسف بھی اچھا کام کر رہے ہیں۔انہوں نے کہا کہ غیر ملکی اور مقامی کی بات نہیں جو بھی کھیلا ہوا ہے کوچنگ کرسکتا ہے۔انضمام الحق کہا کہ پشاور سمیت پورے پاکستان میں پی ایس ایل کے میچز کا انعقاد ہونا چاہیے، پی ایس ایل کے میچز پورے پاکستان میں ہوں گے تو انٹرنیشنل ٹیمیں مختلف وینیوز پر کھیلنے کے لیے رضامند ہوں گی۔
