سڈنی (ا ین این آئی) سابق آسٹریلوی کپتان رکی پونٹنگ نے آئی سی سی ٹی ٹونٹی ورلڈ کپ کے لئے فائنل کھیلنے والی ٹیموں کے حوالے سے پیشگوئی کی ہے۔
آئی سی سی کے لئے جاری کردہ اپنے کالم میں رکی پونٹنگ نے ٹی ٹونٹی ورلڈکپ کے لئے دو فائنلسٹ کے نام بتائے ۔سابق آسٹریلوی کپتان نے کہا کہ یہ بات حتمی تو کوئی نہیں کہہ سکتا کہ ورلڈ کپ کا فائنل کون کھیلنے جا رہا ہے، امید ہے کہ آسٹریلیا گروپ میں بہتر پوزیشن کر لے اور فائنل تک رسائی ممکن ہوجائے ۔رکی پونٹنگ نے کہا کہ مجھے جنوبی افریقہ کی پوزیشن بہت بہتر لگ رہی ہے کیونکہ ورلڈ کپ میں سب سے اچھی کارکردگی اسی کی رہی، یہ ٹیم خطرناک لگ رہی ہے ۔انہوں نے پیشگوئی کی کہ میں شروع سے جو بات کہتا آرہا ہوں، اب بھی اس پر قائم رہوں گا کہ ٹی ٹونٹی ورلڈکپ کا فائنل آسٹریلیا اور بھارت کے درمیان ہوگا ۔آسٹریلیا کے سابق کپتان نے مزید کہا کہ جب میں کپتان تھا اور ہمارا سامنا کسی بھی بڑی ٹیم سے ہوتا تھا تو میں لڑکوں سے کہتا اس لمحے سے محظوظ ہو، اسے کسی اور کھیل کی طرح نہ لیں ۔
