پرتھ (مانیٹرنگ ڈیسک) ٹی ٹوئنٹی ورلڈ کپ میں پاکستان اپنے دوسرے میچ میں زمبابوے سے ٹاس ہار گیا جس پر زمبابوے نے پہلے بیٹنگ کا فیصلہ کیا، مقررہ اوورز میں زمبابوے نے آٹھ وکٹوں کے نقصان پر 130 رنز بنائے اور پاکستان کو جیتنے کے لئے 131 رنز کا ہدف دیا۔ زمبابوے کی طرف سے کریگ اروائن اور ویسلے مدھیویر

نے اننگز کا آغاز کیا، ویسلے مدھیویو 17 رنز بنا کر آؤٹ ہوئے، اروائن 19 رنز بنا کر ہمت ہار گئے، ملٹن شمپا آٹھ رنز بنا سکے، سین ولیمز نے 31 رنز بنائے اور وہ شاداب کا شکار بنے، ریگس چکابوا کی وکٹ بھی شاداب خان کے ہاتھ آئی۔ سکندر رضا نے 9 رنز بنائے انہیں محمد وسیم جونیئر نے آؤٹ کیا، لیوک جونگوی کی وکٹ بھی وسیم جونیئر کے حصے میں آئی، پاکستان کی جانب سے محمد وسیم جونیئر نے 4 کھلاڑیوں کو آؤٹ کیا، شاداب خان نے 3 کھلاڑیوں جبکہ حارث رؤف نے ایک کھلاڑی کو آؤٹ کیا۔ شاہین شاہ آفریدی اور نسیم شاہ کوئی وکٹ حاصل نہ کر سکے۔ ٹارگٹ کے تعاقب میں پاکستان کی جانب سے محمد رضوان اور بابر اعظم بیٹنگ کرنے کے لئے آئے، بابر اعظم نے چار رنز بنائے تھے کہ کیچ تھما کر پویلین لوٹ گئے، محمد رضوان 14 رنز بنا کر بولڈ آؤٹ ہوئے۔ افتخار احمد صرف پانچ رنز بنا سکے۔ شاداب خان نے 17 رنز بنائے اور وہ سکندر رضا کی گیند پر ولیمز کے ہاتھوں کیچ آؤٹ ہوئے۔ حیدر علی بغیرکوئی رنز بنائے سکندر رضا کی گیندپر ایل بی ڈبلیو ہو گئے۔ شان مسعود نے اچھی بیٹنگ کا مظاہرہ کیا انہوں نے 38 گیندوں پر 44 رنز بنائے وہ بھی سکندر رضا کا شکار بنے۔ محمد نواز نے 22 رنز بنائے اور وہ کیچ آؤٹ ہوئے۔ شاہین شاہ آفریدی نے ایک رنز بنایا اور رن آؤٹ ہوگئے۔ اس مقررہ اوورز میں پاکستان کی ٹیم 8 وکٹوں کے نقصان پر 129 رنز بنا سکی اور اسے اپ سیٹ شکست کا سامنا کرنا پڑا۔ زمبابوے کی جانب سے سکندر رضا نے شاندار باؤلنگ کا مظاہرہ کیا انہوں نے تین کھلاڑیوں کو آؤٹ کیا۔

موضوعات:اپ سیٹ شکست