لندن (این این آئی)وزہر اعلیٰ پنجاب چوہدری پرویز الٰہی نے صوبائی وزیر داخلہ ہاشم ڈوگر کی جانب سے پی ٹی آئی کے لانگ مارچ کے دوران جانب دار رہنے کے بیان پر ردم دیتے ہوئے کہا ہے کہ ایک بندے کا ذہنی توازن ٹھیک نہیں ہے۔تفصیلات کے مطابق گزشتہ روز وزیر داخلہ پنجاب ہاشم ڈوگر نے پی ٹی آئی کے ممکنہ لانگ مارچ میں
غیر جانبدار رہنے کا اعلان کرتے ہوئے کہا تھا کہ اگر عمران خان لانگ مارچ کا اعلان کرتے ہیں تو پنجاب حکومت اس سیاسی سرگرمی کا حصہ نہیں بنے گی۔میڈیا سے گفتگو کے دوران جب ایک صحافی نے وزیراعلیٰ پنجاب چوہدری پرویز الٰہی سے پوچھا کہ آپ کے وزیر داخلہ نے بیان دیا ہے کہ پنجاب حکومت لانگ مارچ میں سہولت کاری نہیں کرے گی تو یہ عجیب سی بات نہیں کہ آپ کا لیڈر لانگ مارچ کر رہا ہے اور آپ سہولتیں نہ دیں؟اس سوال کا جواب دیتے ہوئے وزیراعلیٰ پنجاب چودھری پرویز الٰہی نے کہا کہ ایسی باتوں پر آپ بھی غور نہ کیا کریں کیونکہ ایک بندے کا ذہنی توازن نہیں ٹھیک۔انہوں نے کہا کہ سانحہ ماڈل ٹاؤن کیس پر ہماری ایک بہت اعلیٰ ٹیم کام کر رہی ہے، آپ دیکھیں گے کہ ملزمان کو سزا ہوگی بلکہ رانا ثنا اللہ کو تو لازمی سزا ہوگی جس طرح سے اس نے گولیاں چلائیں اور اس کا اسمبلی فلور پر اعترافی بیان موجود ہے جو عدالت کو ثبوت کے طور پر دے رہے ہیں۔پی ٹی آئی کے لانگ مارچ سے متعلق بات کرتے ہوئے وزیر اعلیٰ پنجاب نے کہا کہ اس معاملے پر وقت آنے پر جو بھی عمران خان کہیں گے وہی ہوگا، ارد گرد دیکھیں کہ حکومتیں کس کی ہیں، پنجاب عمران خان کا اپنا ہے، خیبر پختونخوا ہے تو وہاں عمران خان کی حکومت ہے، آزاد کشمیر میں بھی پی ٹی آئی کی حکومت ہے ، گلگت بلتستان ہے
تو وہ چیئرمین پی ٹی آئی کا ہے تو لانگ مارچ کے دوران وفاقی وزیر رانا ثنا اللہ کو تو کھڑے ہونے کی جگہ تک نہیں ملے گی۔پرویز الٰہی نے کہا کہ سیلاب کے دوران شہباز شریف نے پنجاب کو ایک پیسہ نہیں دیا، جس صوبے نے انہیں دو مرتبہ وزیراعلیٰ بنایا، انہیں وزیراعظم بنوایا، انہوں نے اس کا کوئی خیال نہیں کیا۔
