اسلام آباد ٗ لاہور (پی پی آئی ٗ این این  آئی) وزیر خزانہ اسحاق ڈار کے بعد مسلم لیگ (ن) کے قائد نوازشریف کی واپسی کا طریقہ کار طے کر لیا گیا۔ن لیگ کی قانونی ٹیم نے نوازشریف کی واپسی سے قبل پیش بندی کر لی ہے۔پی پی آئی کے مطابق آمد سے قبل نوازشریف کی حفاظتی ضمانت کرائی جائیگی۔حفاظتی ضمانت کے عرصے میں نوازشریف باقاعدہ ضمانت کیلئے پیش ہونگے۔

تاہم عدالت کی جانب سے ضمانت دینے یا جیل بھیجنے کا فیصلہ ہو گا۔مسلم لیگ (ن) کے رہنما کا کہنا ہے کہ نوازشریف کی آمد کا وقت کنفرم نہیں لیکن یہ طے ہے کہ وہ انتخابات سے قبل آئینگے۔دوسری جانب پاکستان مسلم لیگ (ن)کی نائب صدر مریم نواز نے کہا ہے کہ غیر ملکی تربیت یافتہ، فارن فنڈڈ فتنے نے پاکستان کی تقدیر سے کھیلا، عمران خان کو عبرت کا نشان نہ بنایا گیا تو سب کو ملکی تباہی کا ذمہ دار سمجھا جائے گا۔چیئرمین تحریک انصاف عمران خان کی مبینہ آڈیو لیکسامنے آنے پر ٹوئٹر پر اپنے ردعمل کا اظہار کرتے ہوئے مریم نواز نے کہا کہ 22 کروڑ کا ملک 4 سال ایک نااہل، نا ہنجار اور غدار کے ہاتھوں میں گروی رہا۔تکلیف دہ بات یہ نہیں کہ ایک غیر ملکی تربیت یافتہ، فارن فنڈڈ فتنے نے پاکستان کی تقدیر سے کھیلا، اس نے تو یہی کرنا تھا کیونکہ ملک میں انتشار پھیلانے کے عوض اس نے لاکھوں ڈالر پکڑے ہوئے تھے۔

تشویشناک پہلو یہ کہ عمران غدار وہ سب کرتا رہا اور سب چپ کر کے دیکھتے رہے۔انہوںنے کہا کہ عمران خان نے داخلی اور خارجی سطح پر ملک کو تباہ کرنے میں کوئی کسر نہیں چھوڑی اور ثاقب نثار جیسوں نے اسے صادق و امین قرار دیا۔انہوںنے کہا کہ کون سا جرم ہے جو عمران خان پر ثابت نہیں ہوا، وہ خود کہہ رہا ہے کہ میں نے عوام کے ساتھ کھیلنا ہے۔اگر آج ہر طرح کا سنگین جرم ثابت ہونے کے بعد بھی اس غدار عمران کو عبرت کا نشان نہیں بنایا جاتا تو پھر ملک کی تباہی کا ذمہ دار ہم سب کو سمجھا جائے گا۔