اسلام آباد،کراچی (این این آئی، آن لائن)پاکستان تحریکِ انصاف کے رہنما، سابق وزیر اعظم عمران خان کی جانب سے قومی ٹیم کے ہارنے پر ردِ عمل دیتے ہوئے کہاگیاہے کہ کونسا میچ ، میں نے کوئی میچ نہیں دیکھا ۔گزشتہ روز ایشیا کپ 2022 کے سلسلے میں پاکستان اور
سری لنکا کے درمیان فائنل میچ ہوا، سری لنکا پاکستان کو شکست دے کر چھٹی بار ایشین چیمپئن بن گیا۔میچ پر ردِ عمل دیتے ہوئے عمران خان کی ایک ویڈیو وائرل ہو گئی ہے۔صحافی کی جانب سے میچ سے متعلق پوچھے گئے سوال پر عمران خان کہہ رہے ہیں کونسا میچ، میں نے کوئی میچ نہیں دیکھا۔عمران خان کے اس جواب پر سوشل میڈیا صارفین کا کہنا ہے کہ اس وقت ہر پاکستانی کی یہی حالت ہے۔انٹرنیٹ صارفین کا اس پوسٹ کے کمنٹ باکس میں کہنا ہے کہ عمران خان نے میچ ضرور دیکھا ہوگا، ایسا ہو نہیں سکتا کہ وہ اتنا اہم میچ نہ دیکھیں، وہ غمزدہ ہیں اس لیے ایسا بول رہے ہیں۔دوسری جانب شاداب خان کیچز ڈراپ کرنے پر نادم ہیں جب کہ شکست کی ذمہ داری قبول کرلی۔قومی آل راؤنڈر شاداب خان نے سری لنکا کیخلاف فائنل میں ناکامی پر کہا کہ کیچز پکڑ کر ہی میچزجیتے جاتے ہیں، میں معافی چاہتا ہوں، شکست کی ذمہ داری قبول کرتا ہوں، میں نے ٹیم کو مایوس کیا، انھوں نے نسیم شاہ، حارث رؤف اور محمد نواز کی ستائش کی۔ محمد رضوان نے بھی بہت اچھی کوشش کی، پوری ٹیم نے اپنی پوری کوشش کی، ٹائٹل کامیابی پر سری لنکا کو مبارکباد پیش کرتا ہوں۔
