لاہور( این این آئی)مسلم لیگ (ن) نے عمران خان کی جانب سے افواج پاکستان اور نئے آرمی چیف کی تقرری پر ہرزہ رسائی کے خلاف مذمتی اور کارروائی کے مطالبے کی قرارداد پنجاب اسمبلی سیکرٹریٹ میں جمع کر ادی گئی ۔
رکن اسمبلی حناپرویز بٹ،سعدیہ تیمور اور سمیرا کومل کی جانب سے مشترکہ طور پر جمع کرائی گئی قرارداد کے متن میں کہا گیا ہے کہ عوامی جلسوں میں اہم ترین تقرری پر بیان بازی کسی صورت قومی مفاد میں نہیں ، عمران خان اس سے قبل بھی آرمی چیف اور افواج پاکستان سے متعلق نفرت انگیز بیانات دے چکے ہیں،عمران خان کے فوج مخالف بیان کے باعث پاکستان کے 22کروڑ عوام میں شدید غصہ پایا جا رہا ہے،افواج پاکستان کے سینئر جنرلز کی حب الوطنی پر سوالات اٹھانا قابل مذمت ہے،افواج پاکستان کے جنرلز اور جوان دن رات سیلاب متاثرین کی مدد کیلئے کو شاں ہیں،جنرل سرفراز اور دیگر اعلی فوجی افسران کی شہادتیں اس کا بڑا ثبوت ہیں۔ وفاقی حکومت سے مطالبہ ہے کہ عمران خان کے فوج مخالف بیان کا فوری نوٹس لیا جائے اور عمران خان کے خلاف سنگین دفعات کے تحت مقدمہ درج کیا جائے۔
