اسلام آباد (مانیٹرنگ ڈیسک ، اے پی پی)قائم مقام گورنر سٹیٹ بینک مرتضی سید نے کہا ہے کہ پاکستان نے اپنی ضرورت سے زائد ڈالرز کا انتظام کرلیا ہے، مطلوبہ مقدار سے زائد ڈالرز ملکی زرمبادلہ ذخائر کو مضبوط کریں گے۔تفصیلات کے مطابق قائم مقام گورنر اسٹیٹ

بینک مرتضی سید کی قیادت میں اعلی سطح کے وفد نے سٹاک ایکسچینج کا دورہ کیا، جہاں سٹیٹ بینک اور پاکستان اسٹاک ایکسچینج کے اعلی ترین حکام میں اہم ملاقات ہوئی۔قائم مقام گورنر اسٹیٹ بینک مرتضی سید نے کہا کہ مستقبل میں ایکسپورٹرز کے ڈالرز جلد مارکیٹ میں لانے کیلئے مزید اقدامات لیں گے۔قائم مقام گورنر اسٹیٹ بینک نے دعویٰ کیا کہ پاکستان نے اپنی ضرورت سے زائد ڈالرز کا انتظام کرلیا ہے، مطلوبہ مقدار سے زائد ڈالرز ملکی زرمبادلہ ذخائر کو مضبوط کریں گے۔اسٹیٹ بینک نے پاکستان اسٹاک ایکسچینج کو اپنے مکمل تعاون کا یقین دلایا۔دوسری جانب شیڈول بینکوں کے ڈیپازٹس، مختصرمدت کے قرضوں اورسرمایہ کاری میں سالانہ بنیادوں پراضافہ ریکارڈکیاگیاہے۔سٹیٹ بینک آف پاکستان کی جانب سے دستیاب اعدادوشمارکے مطابق جولائی کے مہینہ میں شیڈول بینکوں کے کھاتوں 22101 ارب روپے ریکارڈکیاگیا جو جون کے مقابلہ میں 3.1 فیصد کم اورگزشتہ سال جولائی کے مقابلہ میں 17.3 فیصدزیادہ ہے، جون 2022 میں شیڈول بینکوں کے ڈیپازٹس کاحجم 22810 ارب روپے اورگزشتہ سال جولائی میں 18839 ارب روپے ریکارڈکیاگیاتھا۔جولائی کے مہینہ میں شیڈول بینکوں کی جانب سے مختصرمدت کے قرضہ جات کے حجم میں سالانہ بنیادوں پر22.3 فیصداضافہ اورجون کے مقابلہ میں 0.3 فیصدکی کمی ریکارڈکی گئی ہے۔جولائی میں شیڈول بینکوں کی جانب سے مختصرمدت کے قرضوں کا حجم 10858 ارب روپے ریکارڈکیاگیا جو جون میں 10886 ارب روپے اورگزشتہ سال جولائی میں 8878 ارب روپے تھا۔