اسلام آباد (این این آئی)سابق وزیر اعظم عمران خان کی زیرصدارت پی ٹی آئی کی سیاسی کمیٹی کے اجلاس میں امپورٹڈ حکومت کیخلاف جارحانہ حکمت عملی کو تیزکرنیکا فیصلہ کیا گیا ہے۔ذرائع کے مطاب ق پاکستان تحریک انصاف کے چیئرمین اور سابق وزیراعظم عمران خان کی

زیر صدارت پی ٹی آئی کی سیاسی کمیٹی کا اجلاس ہوا جس میں موجودہ وفاقی حکومت کیخلاف جارحانہ حکمت عملی کو تیزکرنیکا فیصلہ کیا گیاہے۔پی ٹی آئی کی سیاسی کمیٹی کے اجلاس کے حوالے سے ذرائع نے بتایا کہ عمران خان کا اب اگلا ہدف وفاقی حکومت ہوگی اس حوالے سے کپتان نے پارٹی رہنماؤں کو اہم ہدایات جاری کردی ہیں، اجلاس میں پارٹی رہنماؤں سے مختلف امور پر تجاویز بھی لی گئی ہیں۔ذرائع کے مطابق عمران خان نے پارٹی رہنماؤں کو عام انتخابات کی تیاریوں کی بھی ہدایت کی اور کہا ہے کہ پنجاب کی عوام کے مینڈیٹ کو لے کر وفاق کی طرف بڑھیں گے۔اجلاس سے خطاب کرتے ہوئے عمران خان نے کہا کہ چوروں کے ٹولے نے ملک کو تباہ کر دیا۔ عوام جاگ چکی ہے، قوم کو پتہ چل چکا ہے کہ کون جھوٹا ہے اور کون سچا، وہ اب کسی کے بہکاوے میں نہیں آئیگی۔ انہوں نے کہاکہ سپریم کورٹ نے آئین وقانون کے مطابق سچ کا ساتھ دیا۔اجلا س کے بعد میڈیا سے گفتگو کرتے ہوئے رہنما تحریک انصاف فرخ حبیب نے کہا کہ عمران خان جمعرات کو لاہور کا دورہ بھی کریں گے اور پنجاب سے متعلق اہم فیصلے کریں گے۔مسلم لیگ نون پر تنقید کرتے ہوئے فرخ حبیب نے کہا کہ 13 جماعتوں کے اتحاد نے سپریم کورٹ کے بینچ پر حملہ کر کے بدترین مثال قائم کی۔انھوں نے کہا کہ رانا ثنا اللہ کے ہوتے ہوئے مسلم لیگ نون کو کسی دشمن کی ضرورت نہیں۔