لاہور(این این آئی) سپیکر پنجاب اسمبلی چودھری پرویزالٰہی نے کہا ہے کہ تحریک انصاف اور مسلم لیگ مل کر ضمنی الیکشن کی تیاریاں کر رہی ہیں، انشاء اللہ 20 کی 20 سیٹیں جیتیں گے، منحرف ارکان کو عوام نے رد کر دیا ہے، ن لیگ نے تحریک انصاف کے مینڈیٹ پر

ڈاکہ ڈالا ہے، اب وہ وقت دور نہیں جب ہم اپنا چھینا ہوا مینڈیٹ ن لیگ سے واپس لے لیں گے۔ چودھری پرویزالٰہی نے کہا کہ حمزہ شہباز سپریم کورٹ میں دئیے گئے حلف سے مکر گئے، ہمارا مطالبہ ہے کہ سپریم کورٹ تقرر و تبادلے اور ترقیاتی کاموں کی مد میں جاری کیے جانے والے فنڈز کا بھی نوٹس لے جیسے الیکشن کمیشن نے حمزہ شہباز کے خلاف فوری ایکشن لیتے ہوئے روشن گھر سکیم بند کروائی۔ انہوں نے کہا کہ میڈیا رپورٹس کے مطابق ن لیگ کے امیدواروں کے دفاتر کے باہر یوٹیلیٹی سٹور کے ٹرک ووٹروں میں سامان تقسیم کر رہے ہیں جو الیکشن کوڈ آف کنڈکٹ کی کھلم کھلا خلاف ورزی ہے۔ چودھری پرویزالٰہی نے کہا کہ ضمنی الیکشن میں کارکن نتائج آنے تک پولنگ سٹیشنوں پر اپنے ووٹ کا پہرہ دیں کیونکہ ن لیگ والے دھاندلی اور جعلی رزلٹ کے بغیر کبھی نہیں جیت سکتے، لاہور سمیت دیگر اضلاع میں ہونے والے ضمنی الیکشن میں پی ٹی آئی کا گراف بہت بلند ہے، منحرف ارکان اپنے حلقوں میں بے بس اور لاچار نظر آتے ہیں، ان میں عوام کا سامنا کرنے کی ہمت نہیں۔ انہوں نے کہا کہ عمران خان اس وقت قوم کی واحد امید ہیں کہ وہ عوام کو اس کرپٹ اور جعلی حکومت سے نجات دلائیں گے۔