لاہور (این این آئی) وزیراعلی پنجاب کے دوبارہ انتخاب کے لئے مسلم لیگ (ن) نے اپنے اور اتحادیوں کے اراکین کو متحد رکھنے کے لئے پرانی اور آزمودہ حکمت عملی کے تحت نجی ہوٹل میں ٹھہرا دیا۔ علامہ اقبال انٹرنیشنل ایئرپورٹ کے قریب واقع ہوٹل میں ایک سو بیس
سے زائد کمرے بک کروائے گئے ہیں۔پارٹی ذرائع کے مطابق وزیراعلی پنجاب کے دوبارہ انتخاب کے معاملے پر حمزہ شہباز کی زیرصدارت مسلم لیگ (ن) اور اتحادی جماعتوں کے اہم رہنماوں کا اجلاس ہوا۔ اجلاس میں مسلم لیگ (ن) نے اپنی حکمت عملی طے کی گئی جس کے مطابق مسلم لیگ (ن) اور اتحادیوں نے گذشتہ بار کی طرح اس بار بھی متحد رہنے اور اکٹھے قیام کرنے کا فیصلہ کیا۔ اس فیصلے کے بعد تمام اتحادی ارکان صوبائی اسمبلی لاہور کے علامہ اقبال انٹرنیشنل ایئرپورٹ کے قریب واقع نجی ہوٹل میں ٹھہرانے کا فیصلہ کیا گیا اور ہدایت کی گئی کہ تمام ارکان صوبائی اسمبلی ہوٹل میں اکٹھے ہوں گے اور وہیں قیام کریں گے اورآج بروز (جمعہ) کو نماز جمعہ کے بعد تمام اراکین حمزہ شہبازکے ہمراہ اکھٹے بسوں میں سوار ہو کر پنجاب اسمبلی اجلاس میں شرکت کے لئے ہوٹل سے روانہ ہوں گے۔ پارٹی ذرائع کے مطابق ایئرپورٹ کے نزدیک نجی ہوٹلمیں فوری طور پر کمرے بک کروا دئیے گئے اور بیرونی اضلاع سے تعلق رکھنے والا اراکین ایوان اقبال میں ہونے والے اجلاس کے ملتوی ہونے پر سیدھا ہوٹل پہنچ گئے۔ ایم پی اے میاں عبدالروف، توفیق بٹ،نواز چوہان،پیر اشرف رسول سمیت دیگر ہوٹل پہنچے تو انہوں نے میڈیا سے غیررسمی گفتگو میں کہا کہ ہم عدلیہ کے فیصلوں کا احترام کرتے ہیں۔ ہمارے پاس ایوان کی اکثریت موجود ہے اس لئے ہمیں یقین ہے کہ حمزہ شہباز دوبارہ وزیراعلی پنجاب منتخب ہو جائیں گے۔
