بھگوڑے کو سرکاری ہیلی کاپٹر پر بنی گالہ واپس آتے ہی جھوٹ کا نیا دورہ پڑ گیا ہے،رانا ثناء اللہ
اسلام آباد (این این آئی)وزیر داخلہ رانا ثناء اللہ خاں نے شاہ محمود قریشی کے بیان پر ردعمل کا اظہار کرتے ہوئے کہاہے کہ بے گناہ پولیس اہلکار کی شہادت کے ذمہ داروں، اسلحہ، گولہ بارود کوئی سیاسی ردِ عمل نہیں۔
اپنے بیان میں انہوں نے کہاکہ آپ جھوٹ بولیں، گولیاں برسائیں، ڈنڈے چلائیں، آگ لگائیں، سرپھاڑیں، ہم تماشائی بن کر دیکھیں، یہ نہیں ہوسکتا۔ انہوں نے کہاکہ قانون اور قاعدے پر سختی سے عمل ہوگا،
قانون کی خلاف ورزی کریں گے نہ ہی کرنے دیں گے،بھگوڑے کو سرکاری ہیلی کاپٹر پر بنی گالہ واپس آتے ہی جھوٹ کا نیا دورہ پڑ گیا ہے۔ انہوں نے کہاکہ 25 مئی کو جو ڈر کر چھپ گئے تھے،
اب بلوں سے باہر نکل آئے ہیں، 11 دن پہلے کوئی نکلا نہ اب کوئی نکلے گا،جن کا مال کھایا ہے وہ البتہ وصولی کے لئے بنی گالہ ضرور آسکتے ہیں۔
انہوں نے کہاکہ شکر ہے انقلاب آج پشاور سے خیبر پختونخواہ حکومت کے ہیلی کاپٹر پہ اکیلا بنی گالا پہنچ گیا۔ انہوں نے کہاکہ عوام نے آپ کو مسترد کر کے اپنا عوامی ردِ عمل دے دیا ہے۔
انہوں نے کہاکہ عوام نے بھگوڑوں کے خلاف عوامی ردِ عمل دے دیا ہے،جس کے بولنے اور کھلے رہنے سے ہمیں فائدہ ہو اْس کی گرفتاری میں وقت ضائع نہیں کرنا چاہتا،جو بھی قانون توڑے گا قانون کی گرفت میں آئے گا۔
