اسلام آباد ( آن لائن)وزیر اعظم عمران خان نے کہا ہے کہ پہلے بھی مافیا کا مقابلہ کیا اب بھی کروں گا ،عدم اعتماد کی ناکامی کے بعد سب کا حساب چکتا کردوں گا ،میں ان کے اوچھے ہتھکنڈوں سے گھبرانے والا نہیں ہوں، پنجاب میں پیدا ہونے والے حالات پر قابو پا لیں گے۔
وزیراعظم، تمام ارکان میرے ساتھ دیں گے، پریشانی کی کوئی بات نہیں۔جمعرات کے روز وزیراعظم کی زیر صدارت پارٹی کے سینئر رہنمائوں کا اجلاس ہوا جس میں شاہ محمود قریشی، پرویز خٹک، فواد چوہدری، فرخ حبیب شریک ہوئے جبکہ اجلاس میں قانونی ٹیم نے بھی شرکت کی جنہوں نے عدم اعتماد سے نمٹنے کیلئے تفصیلی بریفنگ دی ۔اجلاس میں تحریک عدم اعتماد سے نمٹنے سے متعلق مشاورت کی گئی ،سینئررہنمائوں نے موجودہ صورتحال سے نمٹنے کی تجاویز دیں،اجلاس میں عدم اعتماد کی تحریک کے قانونی پہلووں کا جائزہ لیا گیا، اجلاس میں آئندہ کی حکمت عملی طے کر لی گئی،اتحادیوں سے ہونے والی ملاقاتوں پر تفصیلی گفتگو کی گئی، اجلاس میں اتحادیوں کی جانب سے دی گئی یقین دہانیوں پر اطمینان کا اظہار کیا گیا،پارٹی کے سینئر رہنمائوں نے اس عزم کا اظہار کیا کہ اپوزیشن کی تحریک کو ناکام بنائیں گے،شاہ محمود قریشی نے کہا کہ اپوزیشن کے غبارے سے ہوا نکلنے والی ہے،ان کو تاریخی ناکامی ہوگی ،پرویز خٹک نے کہا کہ اپوزیشن کے کئی ارکان ہمارا ساتھ دیں گے،ہم نے اپنا ہوم ورک مکمل کر لیا ہے،اپوزیشن کو کچھ دن خوش ہو لینے دیں، سرپرائز دیں گے۔
