حیدر آباد(این این آئی) سابق وزیراعظم اور مسلم لیگ (ن )کے رہنما شاہد خاقان عباسی نے دعویٰ کیا ہے کہ وہ پی ٹی آئی کے 22 ارکان قومی اسمبلی کو جانتے ہیں جو حکومت کے ساتھ نہیں چلنا چاہتے۔میڈیا سے گفتگو میں شاہد خاقان عباسی نے کہا کہ ملک کی معیشت تباہ ہوچکی ہے،ملک زوال کا شکار ہے، پاکستان کے مسائل کا حل پارلیمانی جمہوری نظام میں ہے، ہمارے دور میں 2 سال بعد سی پیک کے معاہدے ہوئے

، اب ساڑھے3 سال میں کوئی منصوبہ نہ مکمل ہوا نہ شروع ہوسکا۔ شاہد خاقان عباسی نے کہا کہ جتنی رقم ن لیگ دور میں سندھ کو ملی، نہ پہلے کبھی ملی اور نہ اب ملی ہے، کراچی کا گرین لائن منصوبہ تین سال پہلے مکمل ہوچکا تھا، صرف بسیں آنے میں ساڑھے تین سال لگ گئے۔ انہوںنے کہاکہ جب ہمارے نظام میں غیر آئینی مداخلت ختم ہوگی، حکومت کی بیساکھیاں ہٹیں گی تو چوبیس گھنٹے میں عدم اعتماد ہوجائیگا۔