اسلام آباد(آن لائن) وفاقی دارلحکومت میں سبزیوں اور پھلوں سمیت دیگر اشیائے خورد ونوش کی قیمتوں میں ہوشربا اضافے نے متوسط طبقے کو شدید مشکلات سے دوچار کردیا ہے ،ایران سے ٹماٹر کی درآمد بند ہونے کی وجہ سے سبزی منڈی میں ٹماٹر کے نرخ 200روپے فی کلو تک پہنچ گئے ہیں ،ضلعی انتظامیہ اور مارکیٹ کمیٹی
ک جانب سے جاری ہونے والے نرخ نامے پر سبزی منڈی کے تاجروں نے بھی عمل درآمد سے انکار کردیا ہے۔اسلام آباد کی مارکیٹوں سمیت سبزی منڈی میں پھلوں اور سبزیوں کے نرخوں میں اضافے کی وجہ سے عوام کو شدید مشکلات کا سامنا ہے اور ضلعی انتظامیہ مصنوعی مہنگائی کو کنٹرول کرنے میں مکمل طو رپر ناکام نظر آرہی ہے ،مارکیٹ کمیٹی کی جانب سے جاری ہونے والے نرخ نامے کے مطابق ٹماٹر کی فی کلو قیمت 133روپے مقرر کی گئی ہے جبکہ سبزی منڈی میں اس وقت ٹماٹر کی فی کلو قیمت 200روپے ہے اسی طرح دیگر سبزیوں کی قیمتوں میں بھی بے حد اضافہ ہوگیا ہے اس سلسلے میں جب مارکیٹ کمیٹی کے دفتر سے معلومات لی گئی تو وہاں پر موجود اہلکار نے بتایا کہ ایران سے ٹماٹر سمیت دیگر پھلوں کی درآمد پر عائد پابندی کی وجہ سے نرخوں میں بے حد اضافہ ہوا ہے انہوں نے تسلیم کیا کہ اس وقت سبزی منڈی میں ٹماٹر کے پرچون نرخ 200روپے کلو ہے جبکہ دیگر مارکیٹ میں 220سے 250روپے تک فروخت ہورہی ہے انہوں نے بتایا کہ نرخ نامے میں جو ریٹ درج کیا گیا ہے وہ درست نہیں ہے اس وقت سبزی منڈی میں موسمی سبزیوں کے نرخوں میں بھی بے حد اضافہ ہوگیا ہے جس کو کنٹرول کرنا ضلعی انتظامیہ کے بس میں نہیں ہے۔
