اسلام آباد (نیوز ڈیسک) وزارتِ مذہبی امور نے ذوالحج 1447 ہجری کا چاند دیکھنے کے لیے مرکزی رویتِ ہلال کمیٹی کا اجلاس طلب کر لیا ہے۔

یہ اجلاس 29 ذوالقعدہ بمطابق 17 مئی بروز اتوار محکمہ موسمیات کراچی میں منعقد ہوگا، جبکہ ملک بھر میں زونل رویتِ ہلال کمیٹیوں کے اجلاس بھی اپنے اپنے علاقوں میں ہوں گے۔ اجلاس کی سربراہی چیئرمین مرکزی رویتِ ہلال کمیٹی مولانا عبدالخبیر آزاد کریں گے۔دوسری جانب پاکستان اسپیس اینڈ اپر ایٹماسفیئر ریسرچ کمیشن (سپارکو) نے پیشگوئی کی ہے کہ ذوالحج کا نیا چاند 17 مئی 2026 کو رات ایک بج کر ایک منٹ پر پیدا ہونے کا امکان ہے۔ ادارے کے مطابق غروبِ آفتاب کے وقت چاند کی عمر تقریباً 18 گھنٹے 30 منٹ ہوگی، جو رویت کے لیے موزوں سمجھی جا رہی ہے۔

سپارکو کا کہنا ہے کہ پاکستان کے ساحلی علاقوں میں غروبِ آفتاب اور غروبِ ماہتاب کے درمیان تقریباً ایک گھنٹے کا فرق متوقع ہے، جس کے باعث چاند نظر آنے کے امکانات روشن ہیں، بشرطیکہ موسم صاف ہو اور مطلع بہتر ہو۔فلکیاتی اندازوں کے مطابق یکم ذوالحج 18 مئی بروز پیر کو ہونے کی توقع ہے، جبکہ عیدالاضحیٰ 27 مئی کو منائے جانے کا امکان ظاہر کیا جا رہا ہے۔تاہم سپارکو نے واضح کیا ہے کہ نئے اسلامی مہینے کے آغاز اور چاند نظر آنے کے بارے میں حتمی اعلان مرکزی رویتِ ہلال کمیٹی ہی کرے گی، جو ملک بھر سے موصول ہونے والی شہادتوں اور مشاہدات کی بنیاد پر فیصلہ جاری کرے گی۔