واشنگٹن(این این آئی)مائیکروسوفٹ کے بانی امریکی ارب پتی بل گیٹس کی مطلقہ میلنڈا فرینش نے فیصلہ کیا ہے کہ اب وہ اپنی دولت کے بڑے حصے کو فلاحی ادارے گیٹس فائونڈیشن کو دینے کے حوالے سے اپنے سابقہ اعلان پر عمل نہیں کریں گی۔ امریکی اخبار کے مطابق میلنڈا اب مذکورہ

رقم اپنے سابق شوہر کے ساتھ قائم کیے گئے ادارے کے بجائے دیگر فلاحی اداروں میں تقسیم کریں گی۔اخبار نے باخبر شخصیات کے حوالے سے بتایا کہ 57 سالہ کمپیوٹر ماہر میلنڈا نے اپنا سابقہ موقف 2021 کے اواخر میں تبدیل کیا۔یہ فیصلہ گذشتہ برس میلنڈا اور مائیکروسوفٹ کمپنی کے شریک بانی بل گیٹس کے درمیان طلاق ہو جانے کے بعد سامنے آیا ۔بل گیٹس اور ان کی سابقہ اہلیہ نے 2010 میں اعلان کیا تھا کہ وہ اپنی دولت کا بڑا حصلہ بل اینڈ میلنڈا گیٹس فائونڈیشن کو عطیہ کر دیں گے۔ یہ ادارہ سال 2000 میں قائم ہوا تھا۔ اس نے غربت ، بیماری اور عدم مساوات کے انسداد پر توجہ مرکوز رکھتے ہوئے ابتدائی دو دہائیوں میں 55 ارب ڈالر خرچ کیے۔واضح رہے کہ اس خبر پر بل گیٹس ، میلنڈا فرنش یا گیٹس فانڈیشن کی جانب سے کوئی تبصرہ سامنے نہیں آیا ۔