اسلام آباد(مانیٹرنگ، این این آئی) اسلام آباد وائلڈ لائف منیجمنٹ بورڈ نے مونال ریسٹورنٹ کو وائلڈ لائف ایجوکیشن سنٹر میں تبدیل کرنے کا فیصلہ کر لیا ہے، چیئرپرسن اسلام آباد وائلڈ لائف منیجمنٹ بورڈ نے اس حوالے سے کہا کہ اس سینٹر کے قیام سے مارگلہ ہلز نیشنل پارک کی
جنگلی حیات کے تحفظ بارے آگہی پھیلانے میں مدد ملے گی۔ دوسری جانب اسلام آباد ہائی کورٹ نے کمشنر آفس کو مونال ریسٹورنٹ کی سیل پیر تک نہ چھیڑنے کی ہدایت کردی۔ جمعرات کوعدالت عالیہ میں مونال ریسٹورنٹ سیل کرنے کے خلاف اپیل میں متفرق درخواستوں پر سماعت ہوئی۔ سماعت کے دوران عدالت نے ریمارکس دیے کہ سیل کرنے کا حکم سی ڈی اے اور وائلڈ لائف بورڈ کو تھا، یہ کام کمشنر آفس نے کردیا۔سی ڈی اے وکیل نے عدالت کو بتایا کہ میرا خیال ہے کمشنر آفس نے جلدی میں سیل کرنے کا عمل کیا۔جسٹس عامر فاروق نے ریمارکس دیے کہ چیف کمشنر صاحب جو 2 عہدے رکھتے ہیں شاید ٹوپی بدلنا بھول گئے ہوں۔انہوں نے کہا کہ ایشو یہ ہے کیا سیل کرنے کا کوئی آرڈر کمشنر آفس کو تھا کہ نہیں۔عدالت نے کمشنر آفس کو مونال ریسٹورنٹ کی سیل کو پیر تک نہ چھیڑنے کی ہدایت کی۔عدالت نے چیف کمشنر آفس کے مجاز افسر کو پیر کو عدالت میں پیش ہوکر وضاحت دینے کی ہدایت کرتے ہوئے سماعت پیر تک ملتوی کردی۔
