کراچی(این این آئی)پاکستان سپر لیگ کے سیزن سیون کے میچ کے دوران کراچی کے نیشنل اسٹیڈیم کے باہر کرکٹ کے متوالے بچوں کا معصومیت بھرا احتجاج سوشل میڈیا پر وائرل ہوگیا۔اسٹیڈیم کے باہر بیٹھے بچے دہائی دے رہے ہیں کہ ہمیں جانے نہیں دے رہے آپ شکایت کریں۔

ایک بچہ کیمرے میں دیکھتے ہوئے کہتا ہے کہ پہلے بتایا نہیں کہ ویکسینیشن کروا کر آنی ہے۔ایک اور بچہ کہتا ہے کہ ٹکٹ دے دیئے پھر کہتے ہیں کہ ویکسینیشن کروا کر آئو۔ویڈیو کے آخر میں ایک اور بچہ کہتا ہے کہ یہ ویڈیو ہر جگہ مشہور کریں تاکہ ہمیں اسٹیڈیم میں جانے دیا جائے۔سوشل میڈیا پر بچوں کے احتجاج کی ویڈیو پر دلچسپ تبصرے بھی کیے جا رہے ہیں۔خیال رہے کہ پی ایس ایل میچز میں 12 سال سے کم عمر شائقین کے داخلوں کے معاملے پر پاکستان کرکٹ بورڈنے بچوں کیلئے خریدے جانے والے ٹکٹس ری فنڈ کرنے کا اعلان کیاہے۔پاکستان کرکٹ بورڈکے مطابق ٹکٹوں کی فروخت نیشنل کمانڈ اینڈ آپریشن سینٹر(این سی او سی)کے فیصلے سے قبل شروع ہوچکی تھی، جب ٹکٹوں کی فروخت شروع ہوئی اس وقت سو فیصد تماشائیوں کی اجازت تھی۔ٹکٹس ری فنڈ کے حوالے سے پاکستان کرکٹ بورڈ نے کہاکہ ری فنڈ کی سہولت سے 30 جنوری رات بارہ بجے تک فائدہ اٹھایا جاسکتا ہے۔