اسلام آباد(آن لائن) اپوزیشن جماعتوں نے حکومت کے خلاف احتجاجی تحریک میں تیزی لانے کیلئے 25جنوری کو پی ڈی ایم کا سربراہی اجلاس طلب کرنے کا فیصلہ کیا ہے۔ اجلاس میں پیپلز پارٹی اور اے این پی کو بھی بلائے جانے کا امکان ہے۔ اجلاس میں ملکی سیاسی صورتحال سمیت مہنگائی،بے روزگاری اور بگڑتی ہوئی معاشی صورتحال پر مشاورت کی جائے گی ۔

پی ڈی ایم کے دو بڑوں کے مابین ہونے والی ملاقات کے بعد میڈیا سے بات چیت کرتے ہوئے مسلم لیگ ن کے صدر محمد شہباز شریف نے کہاکہ جے یوآئی سربراہ مولانا فضل الرحمان سے کافی عرصہ سے ملاقات نہیں ہوئی تھی آج مولانا کو خیبر پختونخواہ میں بلدیاتی میں انتخابات میں جیت پر مبارکباد دی ہے انہوں نے کہاکہ پی ڈی ایم کو مشاورت کے ساتھ 25 جنوری کے قریب سربراہی اجلاس بلانے پر اتفاق ہوا ہے اجلاس میں مہنگائی مارچ اور تنظیمی امور سمیت ملکی صورتحال پر بھی مشاورت ہوگی انہوں نے کہاکہ ملاقات میں موجودہ حکومت کے ظالمانہ اقدامات اور منی بجٹ کے نئے طوفان سے متعلق گفتگو ہوئی ہے اوریہ طے کیا ہے کہ متحدہ اپوزیشن ملکر اسکا مقابلہ کرے گی انہوں نے کہاکہ 74 سال میں پاکستان اپنے مشکل ترین دور سے گزر رہا ہے اس موقت معاشی چیلنجز ہوں یا خارجی مسائل ہوں تمام حالات مشکلات کا شکار ہیں میں نے 74 سال میں تحریک انصاف سے زیادہ نااہل حکومت نہیں دیکھی ہے اور اب وقت آگیا ہے کہ اس نااہل حکومت کے خاتمے کیلئے تمام آئینی قانونی اور سیاسی ہتھیار استعمال کئے جائیں گے انہوں نے کہاکہ حکومت کی جانب سے مسلط کردہ منی بجٹ سے مہنگائی کا نیا طوفان آئے گا اپوزیشن ایوان میں منی بجٹ کا بھرپور مقابلہ کرے گی اس موقع پر جے یوآئی کے سربراہ مولانا فضل الرحمن

نے کہاکہ اس حکومت کو بین الاقوامی اداروں کا مفاد عزیز ہے اور عوام کی پروہ نہیں ہے اور اس صورتحال میں 23 مارچ کا لانگ مارچ اور ناگزیر ہوگیا ہے انہوں نے کہاکہ ہم سمجھتے ہیں کہ عوام براہ راست اپنے حق کی جنگ لڑے گی انہوں نے کہاکہ پوری قوم اسلام آباد آ کر مہنگائی کیخلاف مقابلہ کرے گی۔