پشاور(این این آئی)عوامی نیشنل پارٹی خیبرپختونخوا کی ترجمان ثمرہارون بلور نے ڈی آئی خان میں سٹی میئر کے امیدوار عمرخطاب شیرانی کے قتل کا تین میں تحقیقات کا
مطالبہ کردیا ہے۔ صوبائی ترجمان کی جانب سے جاری بیان میں کہا گیاہے کہ عوامی نیشنل پارٹی اس بربریت پر خاموش نہیں رہے گی، ذمہ داروں کو جواب دینا ہوگا۔ تین دن کے اندر تحقیقاتی رپورٹ عوام کے سامنے لائی جائے کہ عمرخطاب شیرانی کو کس نے اور کیوں شہید کیا؟ثمرہارون بلور کا کہنا تھا کہ اس واقعے کے پیچھے جو بھی عوامل کارفرما ہیں، بے نقاب کرنے ہوں گے۔اگر ریاستی اداروں، پولیس اور حکومت کی جانب سے تسلی بخش کارروائی نہیں کی گئی تو اے این پی لائحہ عمل دے گی۔اس قسم کے واقعات سے اے این پی کو ڈرایا، دھمکایا یا جھکایا نہیں جاسکتا۔ انہوں نے کہا کہ عمرخطاب شیرانی ایک سچے اور مخلص سیاسی ورکر تھے، انکی قربانی رائیگاں نہیں جائیگی۔کارکنان سے پرامن رہنے کی اپیل کرتے ہیں، مشاورت کے بعد پارٹی لائحہ عمل دے گی۔
