راولپنڈی،لاہور( آن لائن، این این آئی ) راولپنڈی میں تھانہ نیوٹاؤن کے علاقے فیض آباد میں ملازمت کا جھانسہ دیکر 17 سالہ لڑکی سے مبینہ زیادتی کا واقعہ پیش آیا۔پولیس کے مطابق فیض آباد کے مقامی ہوٹل سے پولیس ایمرجنسی ون فائیو پر17 سالہ لڑکی کی جانب سے مدد کے

لیے کال ملنے پر ایس ایچ او نیوٹاؤن انسپکڑ مرزا جاوید اقبال نے ٹیم کے ساتھ بروقت رسپانڈ کیا تو متاثرہ لڑکی نے موقف اختیارکیا کہ لطیف نامی شخص نے ملازمت دلانے کے لیے قصورسے بلوایا اور ملازمت دلانے کا جھانسہ دیکر مبینہ زیادتی کانشانہ بناڈالا۔جس پر پولیس ٹیم نے آدھے گھنٹے کے اندرملزم کو گرفتارکرلیا جبکہ ہوٹل میں بغیر تصدیق کمرہ کرائے پر دینے پر ظفر نامی ہوٹل منیجرکوبھی گرفتارکرلیا گیا۔پولیس ترجمان کا کہنا تھا متاثرہ لڑکی کا میڈیکل کرایا جارہا ہے جبکہ ہوٹل منیجر کے خلاف الگ سے مقدمہ درج کیا جا رہا ہے۔ ایس پی راول ضیائ الدین کا کہنا تھا کہ ملزم کو قرارواقعی سزا دلوانے کے لئے تمام قانونی تقاضے پورے کئے جائیں گے۔ دوسری جانب پولیس نے شادی کا جھانسہ دے کر زیادتی کی ویڈیو بناکر بلیک میل کرنے والے ملزم کو گرفتار کر لیا گیا ۔پولیس نے زیادتی اوربلیک میلنگ کرنے والے ملزم حماد کو گرفتار کیا۔متاثرہ لڑکی کے مطابق ملزم شادی کے جھانسے میں ورغلا کر زیادتی کا نشانہ بناتا رہا، ملزم غیر اخلاقی ویڈیو کو سوشل میڈیا پر وائرل کرنے کی دھمکیاں بھی دیتا رہا۔پولیس نے متاثرہ لڑکی کی درخواست پر ملزم کو فوری گرفتار کر لیا۔