لاہور، قصور، سرگودھا، (مانیٹرنگ ڈیسک ، این این آئی ، آن لائن )لاہور میں زیادتی کا ایک اور واقعہ ، میڈیا رپورٹس کے مطابق تازہ ترین واقعہ لاہور کے علاقے گجر پورہ میں پیش آیا جہاں 2 لڑکیوں کے ساتھ مبینہ زیادتی کا انکشاف ہوا ہے۔پولیس کے مطابق 3ملزمان نے

لڑکیوں کو شاہدرہ سے اغوا کیا اور گجرپورہ لائے جہاں انہوں نے کرول کھاٹی میں واقع فیکٹری میں لے جا کر دونوں کو زیادتی کا نشانہ بنایا۔پولیس ذرائع کے مطابق زیادتی کے بعد ملزمان موقع سے فرار ہوگئے تاہم فیکٹری کے مالک کو گرفتار کر لیا گیا ہے۔دوسری جانب سی سی پی او لاہور نے تھانہ گجر پورہ کی حدود میں مبینہ زیادتی کے واقعہ کا نوٹس لے لیا ۔ پولیس کے مطابق گجر پورہ واقعہ کا مقدمہ درج کر کے ایک ملزم کو گرفتار کر لیاگیاہے ، واقعہ میں ملوث دیگر ملزمان کو جلد گرفتار کرلیا جائے گا۔غلام محمودڈوگرنے کہا کہ خواتین کے تحفظ کو ہر ممکن یقینی بنایا جائے گا۔دریں اثنا قصور اور سرگودھا میں 8 سال کی 2 بچیوں سے مبینہ زیادتی کا انکشاف ہوا ہے۔ذرائع کے مطابق قصور کی تحصیل کوٹ رادھا کشن اور سرگودھا کے نواحی گاؤں میں 8 سال کی دو بچیوں کے ساتھ مبینہ زیادتی کے واقعات سامنے آئے ہیں۔ ذرائع کا بتانا ہے کہ زیادتی کی اطلاع ملنے پر پولیس نے مقدمات درج کرتے ہوئے 2 ملزمان کو گرفتار کر لیا ہے۔ادھر مظفرگڑھ کے موضع باز والا میں بچے سے مبینہ بدفعلی کا واقعہ سامنے آیا جس کے بعد پولیس نے ملزم کو گرفتار کر کے مقدمہ درج کر لیا۔ پولیس کی جانب سے ملزم کے خلاف تحقیقات کا آغاز بھی کر دیا گیا ہے۔