قاہرہ(این این آئی)مصر میں سوشل میڈیا پر ایک بہادر خاتون کی ویڈیو شیئر کی گئی ہے جس میں خاتون کو سر راہ ہراساں کرنے اور چھیڑ چھاڑ کرنے کی کوشش کرنے والے شخص کو طمانچے رسید کرکے اسے سبق سکھاتے دیکھا جا سکتا ہے۔
میڈیارپورٹس کے مطابق ویڈیوکلپ میں انکشاف کیا گیا کہ خاتون اپنے بچے کے ساتھ سڑک پر کھڑی تھی۔ اس دوران ایک شخص اس کے قریب آیا اور اس کے ساتھ چھیڑ چھاڑ کی کوشش کی۔ اس پر وہ زور سے چلائی اور پھر اسے تھپڑ مارا۔ اس شخص نے معاملے کو رفع دفع کرنے کے لیے معافی مانگی مگرخاتون نے اسے مزید سبق سکھانے کا فیصلہ کیا۔اس دوران کچھ اور لوگ اور راہ گیر بھی وہاں جمع ہوگئے۔ ایک راہ گیر نے بھی ہراسانی کی کوشش کرنے والے شخص کو تھپڑے مارے اور اس کی پٹائی کی۔دوسری طرف مصری سیکیورٹی فورسز نے ویڈیو دیکھنے کے بعد ملزم کی شناخت اور اس کی گرفتاری کی کوشش شروع کردی ہے تاکہ اسے گرفتار کرکے اس کے خلاف قانونی کارروائی عمل میں لائی جا سکے۔سوشل میڈیا پر نشر کی گئی اس ویڈیو میں دیکھی جانے والی خاتون کی بہادری اور جرات کو سراہا جا رہا ہے جس نے ہمت کا مظاہرہ کرکے چھیڑ چھاڑ کرنے کی کوشش کرنے بدمعاش کو اس کی اوقات یاد دلا دی۔
