لاہور(این این آئی)لاہور میں نامزد صوبائی وزیر اسد کھوکھر کے بیٹے کی دعوت ولیمہ کی تقریب میں فائرنگ کے نتیجے میں اسد کھوکھر کے بھائی
مبشر کھوکھر جاں بحق ہوگئے۔مبشر کھوکھر فائرنگ سے شدید زخمی ہوئے، انہیں نجی اسپتال منتقل کیا گیا تاہم وہ دم توڑ گئے۔پولیس کے مطابق فائرنگ کا واقعہ وزیراعلیٰ پنجاب عثمان بزدار کے جانے کے بعد پیش آیا۔عینی شاہد کے مطابق وزیراعلی واپسی کیلئے کار میں بیٹھے ہی تھے کہ فائرنگ کا واقعہ پیش آیا جبکہ فائرنگ کا واقعہ وزیراعلیٰ کی کار سے چند گز کے فاصلے پر ہوا۔ذرائع کے مطابق دو حملہ اورگھات لگاکرگیٹ پرموجود تھے، جیسے ہی نامزد صوبائی وزیر سمیت تینوں بھائی وزیراعلیٰ پنجاب کوگیٹ پرچھوڑنے آئے کہ ملزمان نے فائرنگ کردی۔وزیراعلیٰ کے اسٹاف نے فائرنگ کرنے والے ملزم کوپکڑلیا جسے نامعلوم مقام پر منتقل کردیا گیا ۔فائرنگ کے واقعے کے بعد دعوت ولیمہ منسوخ کردی گئی ،تقریب ڈیفنس میں فارم ہائوس میں منعقد ہورہی تھی۔دوسری جانب وزیراعلیٰ پنجاب عثمان بزدار نے آئی جی پولیس پنجاب سے فائرنگ کے واقعے کی رپورٹ طلب کرلی ۔وزیراعلی نے ہدایت کی کہ گرفتار ملزم کی قانون کے مطابق سزا یقینی بنائی جائے۔
