لاہور( این این آئی )فلور ملزمالکان نے 20کلو آٹے کے تھیلے کی قیمت میں 20روپے اضافہ کر دیا جس سے اس کی پرچون قیمت 1090روپے سے بڑھ کر 1110روپے ہو گئی ہے ۔فلور ملز مالکان کے مطابق اوپن مارکیٹ میں ایک من گندم کی قیمت 2050روپے سے 2060روپے ہے جبکہ حکومت نے ایک من گندم کی قیمت 1800روپے مقرر کی تھی ،
ہمیں حکومت گندم فراہم نہیں کر رہی ،اس صورتحال میں20کلو آٹے کے تھیلے کی قیمت میں 20روپے کا اضافہ کیا گیا ہے ۔فلورملز مالکان نے کہا کہ اوپن مارکیٹ میں جیسے جیسے گندم کی قیمت بڑھے گی اسی تناسب سے آٹے کی قیمت میں اضافہ ہوگا ۔دوسری جانب ملک میں مہنگائی کی شرح میں 0.53 فیصد اضافہ ہوگیا، ادارہ شماریات کی رپورٹ میں بتایا گیا کہ گھی، سبزیاں اور برائلر مرغی کا گوشت مہنگا ہوگیا ہے، 25 اشیائے ضروریہ کی قیمتوں میں کوئی ردوبدل نہیں ہوا۔ادارہ شماریات نے ہفتہ وار مہنگائی کی تفصیلات جاری کردی ہیں۔ جس کے تحت ہفتہ وار بنیادوں پر مہنگائی کی شرح میں 0.53 فیصد کا اضافہ ہوا ہے۔ 25 اشیائے ضروریہ کی قیمتوں میں کوئی ردوبدل نہیں ہوا۔ مہنگی ہونے والی اشیاء میں برائلرمرغی 6 روپے 92 پیسے فی کلو، دال مونگ 7 روپے 2 پیسے فی کلو مہنگی ہوگئی۔ حالیہ ہفتے آلو، گڑ، مٹن، بیف کی قیمت میں اضافہ ہوا۔ انڈے 85 پیسے فی درجن، ایل پی جی کا گھریلو سلنڈر 51 روپے 24 پیسے، خوردنی گھی کا ڈھائی کلو کا ڈبہ 5 روپے 62 پیسے، پیاز 5 روپے 34 پیسے فی کلو مہنگا ہوا ہے۔ٹماٹر 13 روپے 90 پیسے، لہسن 7 روپے 80 پیسے مہنگا ہوگیا ہے۔ دال مسور ایک روپے 25 پیسے اور دال ماش 3 روپے 42 پیسے فی کلو سستی ہوئی ہے۔ دوسری جانب گزشتہ روز ادارہ شماریات کی طرف سے
جاری کردہ ماہانہ رپورٹ کے مطابق مئی کی نسبت جون میں مہنگائی کی شرح میں 0.24 فیصد کمی ہوئی،مالی سال 2020-21 میں مہنگائی کی اوسط شرح 8.90 فیصد رہی، جون میں شرح 9.70 فیصد ریکارڈ کی گئی، مئی کی نسبت جون میں مہنگائی میں 0.24 فیصد کمی ہوئی، ایک سال میں شہروں میں انڈے 32.88 فیصد ، خوردنی گھی 23.75 فیصد ،مصالحہ جات23.27 فیصد ، کوکنگ آئل 21.93 فیصد ،ٹماٹر 19.67 فیصد ، گندم 18.99 فیصد، گوشت 16.66 اور دودھ 14.19 فیصد مہنگاہوا۔
